Талитнан натижйир

Талитнан натижйир

Ассаламу аьлайкум, аьзиз ватанагьлийир! Табасаран халкь илимдихъ юкlв хъайиб, аьлимар гизаф ади гъахьиб ва диндихьна аьхю иштагь айиб ву. Му ухьуз улихь вахтарианмина ихь абйирихьан дуфнайи берекет ву. Гьятта атеистарин учlру вахтарира кмиди ихь аьлимари халкьдиз диндикан мялуматар тувуз чалишмиш шули гъахьну.

Ав, илим урхурайи инсан ужувлахъинди дигиш духьну ккунду, инсандин хасият уткан ва умун апlру ляхнарра мюгькам вуйидар шулу.

Инсанарин хасиятар, ахлакь уткан апlбан, инсан ужувлахъинди илтlикlбан бадали ва ихь ватанагьлийири илимдикан аьгъю апlбан бадали Дагъустандин муфтий шейх Аьгьмад Афандийи «Благонравие праведников» кlуру китаб гъибикlну.

Му китаб аьгъзрариинди инсанари урхура, дурарикан саб хайлиндари чпиз мянфяаьт ктабгъура. Думутlанна гъайри, жюрбежюр шагьрар-районариъ му китабдиан талитар кlули гъяра.

Магьа Табасаран халкьдин арайиъра «Благонравие праведников» китабдиан аьхю талит кlули гъубшну. Му талит, эвелиан вари иштиракчйирин арайиъ, хъасин финализ удучIвдарин арайиъ гъабхури, кьюб пайнакан ибарат дубхьнайиб вуйи.

Сабпи пайнаъ 2000-рихьна инсанар иштирак гъахьнийи, дурарикан финализ удучlвдар 200 кас вуйи. Сабпи пайнан иштиракчйирин жавабариан дурар ужи гьязур духьнайиб мялум гъабхьнийи. Хъа финализ удучlвдарин арайиъ китаб лап ужуди эзбер дапlнайидарра айиб рябкъюрайи.

Талитнан иштиракчйир Табасаран ва Хив районариан, Дербент, Огни, Каспийск ва Мягьячгъала шагьрариан дуфнайидар вуйи. Мурарикан финализ удучlву гьарсар кас гъалиб хьуз лайикьлур вуйи. Амма сабпи йишв гъадабгъну ккунир сар кас вуйи.

Му талитнан оргкомитетди тяйин дапIнайи къайдайиинди, сабпи йишваз лайикьлу гъахьириз «Лада Гранта» машин, кьюбпи йишваз - варж агъзур манат ва шубубпи йишваз - 70 агъзур манат улупнайи.

Иштиракчйири ужудар натижйир улупбаз ва шубубпи-юкьубпи йишвар гъахьидарин арайиъ айи фаркьвал лап цlиб вуйивализ лигну, оргкомитетди юкьубпи йишваз лайикьлу гъахьи касдизра 30 агъзур манат тувбан мясляаьт гъапIну.

Магьа му талитнан натижйир адагъну, гъалиб гъахьидарин пешкешар тувбан бадали, Табасаран райондин Хючна гъулаъ айи гъалайиин аьхю серенжем кIули гъубшну.

Му серенжемдиъ Дагъустандин Муфтиятдин Кьибла терефнаъ айи вакил Мугьяммад Ражабов, Воронеж областдин муфтий, исламдин илмарин доктор Рашид Аьлимурадов, Дербент шагьрин Мугьяммад Ярагъийин ччвурнахъ хъайи мистан имам Мугьяммад-Тlагьир Аьгьмадов, Табасаран райондин имам Ансар Рамазанов ва гь.ж. иштирак гъахьну.

Мажлис кlули гъубхур Табасаран райондин дяват отделин регьбер Аьгьмад Сеферов вуйи.           

Аьлимарин улхбарин арайиъ Заур Салиховди чан уткан сесниинди Гирами Каламдиан аятар ва назмар урхури гъахьну.

Магьа талитнан натижйир ачмиш апlру вахтра хъубкьнийи. Ансар Рамазановди вари иштиракчйириз, гъалиб гъахьидар фициб къайдайиинди тяйин гъапIнуш, яркьуди ктибтну. Мидихъди сабси дугъу, оргкомитетдин мясляаьтниинди, 10-пи йишв`инакьан гъяйиз варидариз пешкешар тувбанди ву кlури, мялум гъапIну.

Магьа му талитнан натижйир:

1. Саидбаева Сирает Садиковна – «Лада Гранта» (Махачкала).
2. Шихмагомедова Саида Рафатовна – 100 аьгъзур (Даг. Огни).
3. Абдуллаев Салман Шихмагомедович – 70 аьгъзур (Табасаран район).
4. Пирова Ишрабика Рамазановна – 30 агъзур (Даг. Огни).
5. Ферзуллаева Хадижат Маратовна (Хив район).
6. Рагимова Лейла Небиюллаевна (Даг. Огни).
7. Абдуллаева Зулейха Шамиловна (Табасаран район).
8. Гаджиибрагимова Гюлханум Шихмагомедовна (Табасаран район).
9. Махмудов Жавид Байбутович (Хив район).
10. Манафова Фатимат Алимурадовна (Хив район).

5-10-пи йишвариз лайикьлу гъахьидариз жюрбежюр пешкешарра тувнийи.

Му талитнакан ихь халкьдиз, гьелбетда, аьхю мянфяаьт гъабхьну.

Гъит Аллагьу Тааьлайи му китаб гъибикlуриз ва му талит гъабхури зегьмет гъизигдариз аьхю савабар дикlри. Хъа талитнаъ гъалиб гъахьидар кlваантlан тебрик апlураза. Гъит Аллагьдин рякъюъ мурариз хъанара заан хъуркьувалар ишри! Амин!

Ансар Рамазанов