Суал-жаваб

Суал-жаваб

Нюкягь апlруган бай хъади хьуб герек вуйин?

Нюкягь апlувал ихь хизан ккебгъувалин варитlан асас фикир тувну ккуни ляхин ву. Гьяйифки, саспидари му ляхниз фикир туврадар, хъа гизаф дюшюшариъ гъалатlра апlура. Нюкягь апlруган, шлубкьан бай хьади хьуб ужу ву. Нюкгьиъ хизан ккебгърайи жигьил ва шуран адаш иштирак духьну ккунду. Эгер мурарихьан шуладарш, шариаьтдиъ улупнайи къайдайиинди имбудар. Думутlанна гъайри, нюкягь гьякьлуб хьпан бадали, мусурман духьну ккунду, анжагъ саб гафниинди вуйи мусурманвал ваъ-гьа, хъа Аллагьу Тааьлайи илирчнайи фарзар тамам апlрудар. Эгер кагьалвалиан, ясана жара себеб ади фарзар тамам апlурадарш, нюкягь ккебгъайиз думу ляхнарихъан туба дапlну, жвуван фарзар тамам апlурза кlури ижми ният дапlну ккун. Нюкягь апlруган, имамди вая аьлимди варидарихьди шагьадат-келима хуз ва туба апlуз гъитру. Гьамдиан, му фукьадар фикир тувну ккуни ляхин вуш, гъаври духьну ккунду.

Йиз нюкгьин гьякьнаан аьхю шаквал айиз. Пиянди айи вахтна жилири фукьан вушра учlру гафар кlури шулу. Фу дапlну ккундуш, йипайчва?

Пиянди айи вахтна жилири чlуру гафар гъапну кlури, никягь батlил шулдар. Эгер дугъу нюкягь алдабхъру гафар гъапнуш, думуган учву имамдихьна, аьлимдихьна душну, якьинди думу ляхниз дилигну ккунду. Гьаз гъапиш нюкягь зарафатар дапIну гъибтруб, ясана пиянди айиган гъапиб ву дупну гъибтруб дар. Учву кьюбридра кьан дарапlди имамдихьна душну, му дюшюш шариаьтдиъ улупнайиганси тамам дапlну ккунду.

Эгер инсандин хулаъ 700 агъзур манат пул аш, дугъаз гьяж фарз шулайин?

Гьяж тамам апlуб дакьатар, жандин сагъвал айи гьарсар мусурман касдин фарз ву. Ав, дициб кьадар пул айи касдиз гьяж тамам апlуб фарз шула. Гьаддиз жвуван жандиъ кьувват имиди, пулин дакьатар имиди гьяж тамам дапlну ккунду. Гъит Аллагь кюмек ишри.

Гьар ражари узу саб ужувлан ляхин гъапlган, имбударизра гьаддикан мялумат тувуз аьшкь шулуйиз. Фу гъапlишра, думу ляхин дипуз шуладарзухьан. Гьаз вуйкlан?

Жвуву гъапlу гьарсаб ужувлан ляхнихъан Аллагьу Тааьлайи ужара тувди. Ухьу апlурайи ужувлан ляхнар анжагъ Аллагь бадали духьну ккунду. Ният Аллагь бадали ккунду. Гьядисдиъ дупна: «Гьарсаб апlру ляхин ниятналан асиллу ву». Уву ният апlин Аллагь бадали, вари имбу ляхнар ужи хьиди. Эгер ният инсанар бадали вуш, думуган инсанариз ухьу апlурайи ляхникан мялумат дубхьнура ккунду. Гьаци вуйиган, сабпи нубатнаан жвуван ният марцц апlин.