Маргьябан я Рамадан

Маргьябан я, маргьябан я, маргьябан,
Маргьябан увуз, Рамадан маргьябан.

Гирами вазар дуфну а,
Ражаб, Шябан ва Рамадан.
Ражаб вазли «изан» апlур,
Шяъбан вазли «тартиб» апlур.

Шяъбандин ваз ккудубкlиган,
Гъюру гирами Рамадан.
Маргьябан увуз, маргьябан
Гирами вуйи Рамадан.

Диндин шартlарикан сабпиб
Ву апlуб яв фарз гъудган.
Кьюбпиб кlуруш ушв бисуб.
Маргьябан увуз, Рамадан.

Ккундуш ушв бисуз шул хъана,
Йисандин жара вахтнара.
Итни йигъан аьхю саваб
Ву ушв бисуризра айиб.

Ккебгъиган Рамадандин ваз,
Ву ухьуз ушв бисубра фарз.
Тялукь яшнаъ айидариз,
Мусурман кас вуйидариз.

Ушв бисуру, ният дапlну
Кlваантlан, мелзналанра ву.
Ва «Сюгьюриз» гъудужвуру,
Гъудган хьайиз ккудубкlуру

Айиганра ушв дибисну,
Гюнгьарихьан дюрхну ккунду.
Гиран ктапIну гьичра ккундар,
Гафниинди, ляхниинди.

Му вазли шул Кьур’ан назил,
Гьаддиз му ваз ву гирами.
Жил’инара му хъадапlну,
«Икьраъ, икьраъ, икьраъ» -дупну.

Гъабхну Жабраили Кьур’ан,
Дидин чlалра Пайгъамбарин.
Тувна ухьуз ваз Рамадан.
Маргьябан увуз, Рамадан.

Дурхну ккунду Кьур’андикан,
ДапIну ккунду дюъйирикан,
КIваъ, мелзниин зикир апIин.
Маргьябан увуз Рамадан.

Кьур’анди рякъ улупура,
Ужуб-харжиб аьян шула,
Гьялал-гьярам къайд апIура.
Кьур’андиъ аьхю уж’вал а.

Гизаф фикир тув Кьур’андиз
Гирами Рамадан вазли -
Натижайиъ гьарсар касдиз
Кюмек тувур Гъияматдиъ.

Маргьябан, Рамадан, увуз,
Гьюрматра ушв биснайириз,
Сабурлуди ушв бисрури,
Убхъруб, зигруб дипур вари.

Эгер увхьан шулдарш бисуз
А ихтияр кьаза апlуз.
Эгер рякъди-хулди ву аш,
Вая уьзур артухъ шулаш.

Эгер шулдарш увхьанра зат,
Касибариз апlин гьюрмат -
Гьадмура ву яв ибадат.
Маргьябан увуз, Рамадан.

Гьамус ккергъру «Таравигьяр»,
Жям`аьтдихъди апlин дурар,
Ясана хизандихъди яв.
Маргьябан увуз Рамадан.

Ушварин ваз ккудубкlайиз,
Касибариз-фагъирариз,
Сад-кьюд йигъарра ккимиди,
Уушвар сэъ тув дурариз.

Маргьябан увуз Рамадан.
Му ву пешкеш Аллагьдихьан.
Ккудучlвиш яв ушвар вазлин,
Дурар хъана кьаза апlин.

Мирас-варис аьгъю апlин,
Аьхюр-бацlир гьяя апlин.
Аллагьдизра шукур апlин.
Маргьябан увуз Рамадан.

Шлин ужудар вуйин ляхнар,
Хайирлудар вуйин гафар,
Аллагьдиз рякъюра юкlвар.
Маргьябан увуз, Рамадан.

Фикир апlин гунгьарикан,
Туба апlин дурарихъан,
Ккудубкlуру ваз Рамадан.
Маргьябан увуз, Рамадан.

Ният апlин Рамадандиз,
Гьяркат апlин ужувлариз,
Чалишмиш йихь марццишнариз.
Маргьябан увуз, Рамадан.

Гирами вуйи Рамадан
Аллагьдихьан вухьуз рягьман:
Ухьуз Женнет рягьят шула,
Жегьеннемдин раккар хъяркьра.

Иблис зунжрари ертlура
Дурурихьан ярхла шула,
Имандихъди Аллагьдихьна
Юкlвар-жанар марцц апlурхьа.

Гъачай, дустар, дисуз ушвар,
Юкlв ачухъди ва разиди.
Аллагьди аьфв апlур гунгьар,
Женнетдиз рякъ ачмиш хьиди.

Дирипlди, дурубхъди йигъну,
Лап ужудар ляхнар апlру,
Ихь улар ва мелзра уьбхру,
Маргьябан увуз, Рамадан.

«Лейлатур-кьадр» а му вазлиъ,
Агъзур вазтlан ву гирами.
Ва артухъди тlяаьт апlин
Маргьябан увуз, Рамадан.

Учу увуз ккилигурча,
Гирами вуйи Рамадан.
Ва ич юкlвар ачухъ апlин,
Маргьябан увуз, Рамадан.

Рамадан ву ухьуз пешкеш,
Аллагьдихьан вуйи пешкеш,
Ихь юкlвариз ва жанариз.
Маргьябан увуз, Рамадан.

Рамадан ваз гирами ву,
Абурлу духьну ккун ухьу.
Ккилигури ача увуз.
Маргьябан увуз, Рамадан.

Аьгъю духьну гьардиз ккунду,
Аллагьди тувнайиб думу,
Марцц апlуз ихь юкlвар-жанар.
Маргьябан увуз, Рамадан.

Рамазандин вазли кlура
Аьхю сабур апlин кlура,
Туври ухьуз сагъвал, иман.
Маргьябан увуз, Рамадан.

Тувна ухьуз вардиз вахтар,
Вари Рамадандин йигъар,
Аьхиратдиз «Чанта» апlин.
Маргьябан увуз, Рамадан.

Ушварин ваз ккудубкlиган
Машквран гъудган-суннат апlин,
идуль-фитр мубарак апlин.
Маргьябан увуз, Рамадан.

Ухьуз «Рягьмат» Аллагьдихьан,
«Шафааьт» РасулуЛлагьдин,
Иман артухъ Аллагьдихьан,
Маргьябан увуз, Рамадан.

МУГЬЯММАД ГЬЯСРАТЛИН