Мединайиз рякъюъ
Кьасумов Амир Мирзаевич,
Жулжагъ гъул.
РФ-йин жюрбежюр искусствойин ва литературайин конкурсдин лауреат ва дипломант:
Медаль Москва 1985.
Медаль Москва 1987.
Медаль Москва 1989. Дагъустан Республикайин культурайин лайикьлу работник (2004 й).
РФ-йин журналистарин Союздин член (2005 й).
РФ-йин уьмуми образованияйин лайикьлу работник (2006 й).
РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.) "Табасаран райондин улихь лайикьлувализ лигну" - медаль, 29.08.2024.
Завун аьршра
Ачухъди ву,
Табиаьтра
Дубхьна имшагь.
Мекка шагьриъ
Атlабгну а
Ислягьвалин,
Исламдин нур –
Сар Аллагьди
Чан лукlариз
Гъапlуб савкьат.
Ихь Пайгъамбар
(Салават ва
Салам дугъаз),
Замзамдин шид
Дубхъну, деу.
Хъасин дугъу
Гъижикlнийи
Гъудгнин
мушвахь.
Ккудубзу шид
Аьсгьябари
Чпин машаркан
Ктатурайи.
Хъасин дугъу
Кьюб рякатдин
Гъудган гъапlу.
Бутпересар
Уч духьнайи
Кьяаьбайихь,
Ихь Пайгъамбри
Салам дугъаз)
Гъапний гафар
Кьур`андиан:
«Дюзвал дуфна,
Кучlал гьебгра,
Диди гьарган
Хуру бала».
Ихь Пайгъамбри
(Салават ва
Салам дугъаз)
Гъитнийи дих
Апlуз Уьсман
Ибн Талхуйиз.
Дугъахь хьайи
Бурма Хулан
Сар Аллагьдин –
Кяаьбайин.
Арццуз гъиту
Дидин раккнар,
Марцц апlуру
Душваъ цалар,
Лазим даруб
Гатlабхьуру
Ва кьюб рякат
Гъудган апlур.
Хъасин кlуру
Ихь Пайгъамбри
(Салават ва
Салам дугъаз):
-– Кьурайшитар!
Гьапlза учвкан,
Я рягьматлу
Гъардшин баяр!
-Рягьим апlин –
Гъабхьи жаваб.
-Кlурза узу
Учвуз Юсуф
Пайгъамбри ихь
Чан гъардшариз
Гъапи гафар:
«Гьич саризра
Дарибшри гъи
Тягьна учвуз,
Вучва азад».
Ихь Пайгъамбри
(Салават ва
Салам дугъаз)
Мекка шагьриъ
Диву къайда.
Аллагьдин нур,
Ихь ислам дин
Амриинди
Сар Аллагьдин
Гъабхьи мюгькам.
Азад гъапlу
Мушваъ халкьар
Буржариккан.
Улубкьган вахт
Гъудгниз лисун,
Ихь Пайгъамбри
(Салават ва
Салам дугъаз)
Амур гъапlу:
- Билал, йива
Азан гъваълан
Кяаьбайин,
Ебхьуз вардиз
Теклиф апlин
Икрам апlуз
Сар Аллагьдиз
Мусурмнар чпин
Рякъюъ учlври.
Гъяра йигъар,
Йисар, аьсрар,
Мюгькам шула
Ихь дин дикъат,
Кяаьбайиъ
Йигъан хьубан
Азандин сес
Ебхьури а.
Мекка шагьур
Гъадабгъбахъан
Хьудпи йигъан
Ихь Пайгъамбри
(Салават ва
Салам дугъаз)
Амур гъапlу
Дармадагъин
Апlуз Нахлиъ
Айи Уззу
Ччвур али бут.
Халид гъушу,
Гъилинж гъиву
Ва швур гъабхьи,
Гъвандин вушра,
Му хяви бут.
Ихь Пайгъамбри
(Салават ва
Салам дугъаз)
Гьерху дугъхьан:
– Фу гъябкъюнвуз?
– Гьич фукlара.
Гъирмиш гъапlза
Му гъвандин бут.
– Хъана гъарах,
Лига дикъат.
Халид гъушу,
Рякъюъ мугъаз
Гъяркъю кушар
Тlурччвурайи
Ва узди чаз
Гъюри айи
Сар дишагьли.
Хъана гъиву
Дугъу гъилинж,
Швур гъабхьнийи
Му пис вуйи рюгь.
Кьяляхъ дуфну.
Ктибту дугъу
Рякъюъ гъабхьиб
Ихь Пайгъамбриз
(Салават ва
Салам дугъаз):
– Сарун жил`ин
Инсанари
Икрам апlдар
Му пис рюгьназ».
Гьамциб кьисмат
Гъабхьи жара
Бутаринра –
Сува, Манат
Кlурударин.
