Бабан дидар
Бабан дидар
Бабан мухриъ гъургъушумси убхьури,
Улариан гьаз крюбхюраш, аьгъдарнуз?
Цlайлапанар хътlюкъюрайи дагъдинси,
Бабан дидар фу вуш, хабар адарнуз?
Гьич саб гьюкмиз мютIюгъ дару бабан сир
Ачмиш апlру ачар, бай вуш, яв хлиъ а.
Бабкан увуз адаршра вижна-фикир,
Думу гьарган яв дидарнан сюгьриъ а.
Убхьури назук улариъ гъургъушум,
Цlадлар йиз кlвак кирчра, фу-вуш пуз ккунди.
Му веледдин баб ву, гьаз духьна мягьрум,
Веледдин дад дадмиш апlуз даршули.
Бабан дюаь мустажаб ву, гучl апlин,
Дугъан агьнакк ккахъру велед даришри.
Бабан сирар зурбадар ву, нач апlин,
Дугъаз йивру йирфар балихъ даришри.
Бабан дидар абгурайи бенде! Йиз
Багъри вува, гъач, йиз мухриъ йишв авуз.
Увуз махсус гафар гьуркIри адариз,
Хъана буржлу вуди гъузраза увуз.
Абйир-бабар яв улихь ликриин илмиди, дурариз вафалу йихь. Шубуд-юкьуд йисариинди аьзарлу духьнайи абайин вая бабан дахънайи йишв, дурарин маш дярябкъю веледарра гъи ихь арайиъ алахьура. Гъачlиган, дурккну малар садакьа тувра, Кьур’ан урхуз, зикирра апlуз гъитра. Мяна фу ву? Азгъунвал, учв заанди улупувал, сарун жара мяна мушваъ фукlара адар.
Кьабивалиан ва жара саб уьзриан, гаф-чlалназ, лицбаз бязидарик ярумчугъвал кабхъру. Рякъюъ-хулиъ, базарариъ бязи веледари, дурар чпин абйир-бабар вуйиб улулупри, аьйиб вуйибси гьисс апlури шулу. Хъа жвуван абйир-бабар такабурлу апlувалтlан зиина вуйи къанажагъдин жара лишанра хьуз мумкин дар.
Эй аьзиз вуйи веледар! Эгер ичв абйир-бабар дин Исламдихьан ярхла вуйи чиркин ниятариин алди гъахьиш, ичв иллаж вуйибкьан гъаврикк ккауз зегьмет зигай, амма дурариз йирфар миванай!
