ГЪУДГАН
Фарз гъудган
СюбгьянАллагь!
Ухьу гъапlу
Ихь фарз гъудган
Ачар шулу
Женнет багъдиз.
ИншаАллагь!
МаншаАллагь!
Аллагь заан
Вухьуз вартlан,
Вари тувну
Ахьуз аьрштlан.
Му насигьят
Аьршдин тlалаб
Хаишра ву
Ихь мусурман
Умматдикан –
Шариаьтдин
Гьюкум уьбхюб,
Тувнай фарзар
Тамам апlуб,
Сар Аллагьдиз
Вафалуди.
Иман
СюбгьянАллагь!
Ижми иман
Айи инсан
Гъудган апlрур
Шулу гьарган.
Гучl ка дугъаз
Аллагьдикан,
Нач ву дугъаз
Аллагьдихьан.
Ву имшагьур
Ва рягьимлур,
Машниинра
Аьршдин нур ал.
Кlваъ уьрхюра
Первердигар,
Ислам диндин
Рякъюъ ади.
Вахтниинди,
Дикъатлуди
Гъудган апlрур
Шариаьтдин
Гьюкмарихъди
Шулу вали
Сар Аллагьдин.
МаншаАллагь!
Эмин кас
Эмин кас ву
Гьякь мусурман,
Дюз-дугъривал
Ккунду гьарган.
Вафалу ву
Сар Аллагьдиз.
Гъудган апlрур
Вахтниинди.
Аьгъю апlин,
Адамдин бай.
Дицир инсан
Гьяркатнаъ шул
Жвуми йигъан,
Аллагьдин Хал
Кlваъ уьбхюри,
Ибадатназ
Кьан дарапlди,
Ният дапlну,
Рякъюъ учlвуз,
Дюаь дубхну,
Мистаз дуфну,
Гирами вуйи
Суннат апlуз,
Насигьятназ
Дикъат тувуз,
Имамдихъди
Гъудган хъибтlуз.
Кlваин уьбх гьа,
Адамдин бай,
Жвуми йигъан
Садакьа тув.
Кьабул апlур
Сар Аллагьди.
Садакьа тув
Муъмин касдиз
Ясан мистаз.
Ву жумарт кас
Ккунир Аллагь.
Жумартур ву
Первердигар.
Вузра тувди
Хабарсузди.
Аллагь рази
Шулу увкан.
ИншаАллагь!
Гирами зиз
Аьгъю апlин,
Адамдин бай:
Иблис гьарган
Шул увухъди,
Гъитри ургуз
Ва улдугуз.
Терг апlин яв
Нафсдин гьяркат,
Шейтlнин васвас.
Гъудгниз гьязур
Йихь гьа дикъат,
Рюгьнак кади
Гирами зиз.
Диди иблис
Шавли апlур.
Гъудган заан
Ибадатвал
Ва акв шулу
Ахиратдиъ.
Бахт ву думу
Му дюньяйин.
Рягьим, рягьмат
Айиб аьршдин,
Женнетдиъ йишв
Гьязур апlруб.
Кьан дарапlди
Апlин гъудган,
Шейтlнин мукьам
Апlин ярхла.
Ижми апlин
Му яв иман,
Эзбер дапlну
Аьршдин калам.
Гъудган нур ву
Аьрштlан гьапlуб,
Сар Аллагьдиз
Багахьна хьуз.
ИншаАллагь!
Женнет ккундуш
Шюкюр ибшри
Сар Аллагьдиз!
Дикъат гъудган
Апlру инсан,
Эзбер дапlну
Калам аьршдин,
Шулу гьарган
Уж`вал апlрур,
Сабур хъайир.
Гучlна нач ка
Аллагьдихьан,
Аьгъя дугъаз
Ахиратра.
Убзур дугъу
Диндин рузи
Му дюньяйиъ
Ахиратдиз,
Кьисмат шулу
Мягьсул аьршдин.
Нази-ниъмат,
Гьарсаб йимиш
А женнетдиъ.
Аьгъю апlин,
Адамдин бай,
Гъудган апlру
Муъминариз
Марцци кlваан
Женнетдиъ йишв
Гьязур дапlна.
Ихь Пайгъамбрин
(Салават ва
Салам дугъаз
Гьядисдик ка:
«Ккундуш увуз
Женнет зухъди,
Гъудган апlин…»
Фикир апlин,
Адамдин бай,
Аьршдин сир а,
Женнетдизди
Рякъюъ шулва
Яваш-яваш.
Валлагь
Шюкюр ибшри
Сар Аллагьдиз!
Салават ва
Салам вуйиз
Ихь Пайгъамбар
Мугьяммадиз.
Дикъат кlурза
Марцци кlваан,
Кlваъ уьрхюри
Первердигар.
… Валлагь! Валлагь,
Гъавриъ хьиган
Сар Аллагьдин,
Дугъу гьау
Пайгъамбрарин
(Салават ва
Салам вуйиз),
Фарз вуй гъудган
Абхъну кlваъ йиз.
Шулза гьарган
Ккилигури,
Вахт гъабхьиган
Ебхьурузуз
Азан мист`ан.
Гукlни шулу
Гъянаъ йиз юкlв,
Уягъ шулу
Му йиз беден,
Рюгьнак шулу
Гирами зиз,
Кlваин шулзуз
Дивандин вахт,
Гъиямат йигъ,
Аьрасайин
Диван-майдан,
Фициб шулуш
Му йиз аьхир.
Рягьим апlри
Сар Аллагьди.
Амин! Амин!
Гьикма уягъ
Шул думуган,
Кlваин дубхьну
Гъюруб аьжал.
Уларилан
Гъяру нивгъар
Хабарсузди.
Гъубшу уьмур
Уларихь хьа.
Шюкюр ибшри
Сар Аллагьдиз,
Тувубдиин
Йихьай рази.
СюбгьянАллагь!
Аллагь вартlан
Заанур ву!
Нур ву гъудган
Первердигар
Сар Аллагьди
Чан лукlариз,
Ихь мусурман
Умматариз
Арштlан туву
Нур ву гъудган.
Сар Аллагьдиз
Багахьна хьуз
Яв фарз вуйи
Гъудган апlин.
Му дюньяйиъ
Бахтавар хьуз
Гъудган апlин.
Женнетдизди
Рякъ ву гъудган.
Аллагьу акбар!
Аллагьу акбар!
Аллагьу акбар!
Заан гафар
Кlури кlваан,
Мелзниинди
Текрар апlин,
Адамдин бай,
Ижми апlуз
Му яв иман
Ва ккабалгуз
Ахират хал.
МаншаАллагь!
