Штуз айи жюрйир

Штуз 4 жюре а:

Сабпи жюре: Марцциб ва гъудгнин жикlуз, гъусул апlуз лайикь вуйиб. Дициб штуз мутlлакь кlуру, яна сабдизра ишлетмиш дарапlуб ва чан лишнарра дигиш дархьиб.

Кьюбпи жюре: Марцциб, амма ишлетмиш апlуз даршлуб. Эгер дициб шид жандик, я палтарик кубкlиш, нежес гьисаб шуладар, амма дидихьди гъудгнин жикlуз, ясана думу штухъди гъудган апlруган алахьру палтар урччуз шулдар. Мицдар штарикан гьисаб шула, мисалназ, гъудгнин жикlбаз ишлетмиш гъапlу шид, яна 216 литртlан цlиб вуйиб, ясана жара карцlнайи мутмйир марцц гъапlу шид. Мициб шид гъудгнин жикlуз ишлетмиш апlуз хай шулдар, хъа жара ляхнариз, мисалназ, кабцlнайибдихьан марцц хьуз, ясана рюкьчар-гъабар жикlуз ишлетмиш апlуз шулу.

Шубубпи жюре: Марцциб ва марцц апlру шид. Думу мани гьюкуматариъ ригъдикк рукькан, йифрикан, алюминийдикан ва гь.ж. шид убзуз шлу гъабариъ мани ва убцру гъабхьи шид ву. Дициб шид жандак жибкlруган ишлетмиш апlуб карагьат ву, яна ужи дар. Хъа гъизилин ва арсран гъабариъ мани гъабхьиб карагьат дар. Думу шид маниди имиди ишлетмиш апlуб карагьат ву. Дагъустан ва ихь багахь хьайи регионар мани йишварикан гьисаб шуладар, гьаддиз ухьухь думу карагьатвал шуладар. Хъа дициб штухъди жикlувалра, гьацдар гъабариъ уч гъабхьи шид думу мани хьувалиан инсандин жандиз зарар тувруган карагьат шулайиб ву. Яна, гьаци ишлетмиш гъапlу штуан хамран уьзур арайиз гъюз мумкин ву.

Юкьубпи жюре: Нежес кайи шид. Эгер думу шид жандик, палтарик кубкlиш, думу марцц дапlну ккунду.

Чиркин шид гьисаб апlуру 216 литр шид адру йишвак сацlибкьана нежес кубкlнуш, гьеле думу себеб дубхьну шид дигиш гъабхьундаршра. Гьацира эгер 216 литртlан артухъ вуди, амма нежес кабхъбиинди штун сабкьан лишан дигиш гъабхьнуш. Мициб шид гъудгнин жикlуз, жандак жибкlуз (гъусул апlуз) ишлетмиш апIуз хай шулдар.