Пайгъамбари ﷺ думу гъипlундар
Пайгъамбари ﷺ думу гъипlундар
Пайгъамбар ﷺ Мединайиз удучlвну гъушган, сабпи нубатнаан, мист тикмиш апlуз хъюгъну, хъасин думу мистак касбну чаз саб бицlи хал гъапlну. Хал тикмиш апlайизкьан Пайгъамбар ﷺ Абу Аюб аль-Ансари кlуру асгьябдин хулаъ яшамиш гъахьну. Саб ражари думу хизандинна Пайгъамбарин ﷺ арайиъ гьамциб дюшюш гъабхьну.
Ибн Исхакди ктибтура: «Узуз Язид ибн Аби Гьябибди Марсад ибн Абдуллагь аль-Язанийихьан ва Абу Рухма ас-Самаийихьан гъеебхьунзуз, дугъу чаз Абу Аюбдихьан гьамци гъеебхьунзуз гъапну:
"Пайгъамбар ﷺ йиз хулаъ гъузган, думу сабпи мертебайиъ гъахьну, хъа узуна Умму Аюб - кьюбпибдиъ. Узу гъапунза: «Я Пайгъамбар, узу кьюбпи мертебайиъ ади, хъа уву сабпибдиъ ади ккундарзуз. Уву кьюбпибдиз за йихь, хъа учу сабпибдиз ис хьидича». Пайгъамбари ﷺ гъапну: «Я Абу Аюб, узуз ва узухьна гъюрудариз сабпибдиъ рягьятди шул».
Гьамци Пайгъамбар ﷺ сабпи мертебейиъ, хъа учу кьюбпибдиъ яшамиш хьуз хъюгъюнча. Саб ражари гажин дутlубкlну, шид удубзган, узуна Умму Аюбди, гьадму шид Пайгъамбар ﷺ айи йишвазди дурубшри кlури, дишлади марцц апlуз хъюгъча».
Давам апlури, Абу Аюбди гъапи: "Учу Пайгъамбаризра ﷺ хябяхъдиз ипlруб гьязур апlури шуйча. Дугъу гъаб кьяляхъ гъапlган, узуна Умму Аюбди Пайгъамбари ﷺ куркlу йишвак кубсри, гъабраъ имбуб ипlури шуйча ва гьаци берекет гъадабгъуйча.
Сад йигъан хябяхъган гьаци ипlруб хьади гъушча, дидик гулина шарш кайи. Пайгъамбари ﷺ ипlруб кьяляхъ гъапlну. Гучl дубхьну, Пайгъамбарихьан ﷺ душну гьерхза: «Я Пайгъамбар! Уву ипlруб кьяляхъ гъапlунва ва уву гьичра дидкан гъипlганси дарва. Дидиз улихьна уву кьяляхъ гъапlубдикан узуна Умму Аюбди кимбуб ипlури берекет шуйчуз».
Пайгъамбари ﷺ гъапи: «Му ипlрубдик ниъ хъайидар кайи, хъа узу кми-кмиди инсанарихъди шулза. Хъа учву ипlинай». Ва думу хураг учу гъипlча. Гьаму дюшюшдин кьяляхъ учу гьич сабанра Пайгъамбариз ﷺ вуйи хурагнак ниъ хъайиб капlундарча"» (ат-Табарани).
«Ас-Сира ан-Набавия» китабдиан
