Ул апlувал кайиб ву
Ул апlувал кайиб ву
Му жилиин ул апlувалин гьякьнаан деребхьу ксар гьичра адаршул. Улихь вахтарихъанмина му ляхниз асас фикир туври гъахьну. Бязи вахтари инсан саб дупну кетlерццган, духтрари чпин ляхин дар кlури, думу кас йигълан-йигъаз читин гьялнаъ ахъру.
Духтрарихьан гьичра кюмек адруган, инсанар ул алдагъру ксар, гирами Каламдиъди сабаб апlрударихьна илтlикlури шулу. Фукьан ухди инсандиз думу ляхнарикан аьгъю гъабхьиш, гьадмукьан ухди рягьятвалра шул.
Умму Саламайи ктибтура: Пайгъамбариз ﷺ йиз хулаъ машнаъ кlарушин ади сар риш гъяркъган, дугъу гъапну: «Дугъ’ина рукь’я (ул гъапlган урхрудар) урхай, дугъриданна дугъаз ул дапlна».
Абу Саид аль-Худрийи ктибтура: «Фалакь» ва «Ан-Нас» сурйир Аллагьу Тааьлайи гьаайизкьан гагьди Пайгъамбари ﷺ Аллагьу Тааьлайикан, дюъйир апlури, жинарихьан ва ул апlбахьан уьрхюб ккун апlури гъахьну. Гьадрар гьаъбахъан Пайгъамбари ﷺ анжагъ гьадрар урхури гъахьи».
Аьбдуллагь ибн Аьббасди ктибтураки, Пайгъамбари ﷺ кми-кмиди гьаму дюаь урхури Гьясан ва Гьюсейн ул апlбахьан уьрхюб ккун апlури гъахьну:
«Аьуьзу би-калиматиллагь таммати мин кулли шайтlанин ва гьамматин ва мин кулли аьйнин ламматин».
Уьсман ибн Аьффанди ктибтураки, Пайгъамбари ﷺ, гьаму исихъ улупнайи дюъйир гвачlнинган ва хябяхъган шубуб ражари урхури гъахьиш, дугъаз сабдихьанра зарар адар, гъапну:
«Бисмиллагьи ллази ла язурру мааь исмигьи шайун филь арзи ва ла фи ссамаи ва гьува ссамиуль аьлим».
Пайгъамбари ﷺ ва асгьябари му ляхниз асас фикир туври гъахьну. Гьаз гъапиш ул апlувалиан жюрбежюр уьзрар арайиз гъюб мумкин ву. Инсан саб духтрарин уьзурра ктарди ипни шулу, ясана жара гьацдар дигиш’валар шулу.
Сабсана ляхникан дарпиди гъузуз шулдар! Саспидари жвуваз сабаб абгури фалчйирихьна ва гьацира жарадарихьна илтlикlури шулу. Дупну ккундуки, думу ляхин Ислам диндиъ гьярам дапlнайиб ву.
Эгер инсан фалчйирихьна илтlикlуз хъюгъиш, дидкан дугъаз ва дугъан диндиз аьхю зарар а.
Гьаци вуйиган, жвуваз сабаб абгури ухьу Ислам диндин рякълан улдучlвну ккундар. Зиихъ дупнайиганси, ухьуз гьарсаб ляхниз Пайгъамбари ﷺ рякъ улупна. Гьадрарин арайиан зиихъ дупнайиганси, ул гъапlганра Пайгъамбарихьан дуфнайи дюъйир а, ари гьадрар урхури, Аллагьу Тааьлайикан ккун апlури духьну ккунду.
Гъит Аллагьу Тааьлайи ухьуз ужувлар туври, гъит гьарсар кас ул апlбахьан, дидихъди аьлакьалу чlуруваларихьан, писваларихьан уьрхри! Амин!
