Гьяждиз гьязур шулухьа
Гьяждиз гьязур шулухьа
Гьар йисан Урусатдиан агъзрариинди мусурмнар Ислам диндин фарз гьяж тамам апlуз гирами Мекка ва Медина шагьрарин жилариина гъягъюра. Гьар йисан гьяждин вахт багахь шули, учу ихь ватанагьлийириз йислан-йисаз арайиз гъюрайи дигиш’валарикан ктибтури шулча.
Гъи ухьуз 2024-пи йисан гьяждиз гъягъюз ният айидариз алахьру дигиш’валарикан «Марва-тур» компанияйин кlулин директор Булат Къурбановди мялумат тувра.
Документар ва вахт
«Гьяждиз гъягъюз заявкйир тувру вахт дигиш дубхьна. Гьаму йисан, улхьан йисариси дарди, гьяждиз гъягъру вахт хьайиз саб вазна гьацl ккимиди, документар кьабул апlури гъубзурдар, – ктибтура Булат Къурбановди.
Улихьна йисари гьяждиз гъягъру вахт хъубкьайизкьан визйир рукьури имиди шуйи, хъа гьамус вахт ккимиди визйир тувувал дебккра.
Му Саудияйин тlалаб ву ва гьациб къайдайиинди дурариз гьяждихьна хъанара ужуйи гьязур хьуз ккунду. Улихьна йисари дурариз тап аьхиризкьан гьаму йисан якьинди швнур кас гьяждиз гъюруш аьгъю шулдайи, гьаддиз дурариз Минайиъ, Муздалифайиъ, Аьрафайиъ вахт ккимиди йишвар гьязур апlуз читинди шуйи. Гьамус дурари чпиз му ляхнарихьна гьязур хьуз гизаф вахт гъибтра.
Гьаддиз гьаму йисан гьяждиз гъягъюз ният айидарикан вахтниинди документар тувуб ккун апlурача. Шлиз загранпаспорт адарш, думу ляхнизра вахтниинди лигну ккунду ва 5 йистlан артухъ вуйи паспорт гьязур дапlну ккунду».
«Гьяждиз гъягъюз хай даршлудар»
«Марва-тур» компанияйин директорин гафариинди гьаму йисан Саудияйи гьяждиз гъюз ихтияр адарди дуфнайидарин гьякьнаан ижмишнар дапlну а. Дурари Муздалифайиъ, Минайиъ, Аьрафайиъ тяйин дапlнайи алатарихъди фуж якьинди гьяж-турианмина дуфнаш, хъа фужсан чаз ихтияр адру къайдайиинди дуфнаш, аьгъю апlиди.
Медицинайин тIалабарикан
Гьяждин вахтна асас фикир гьяжйирин сагъламвализ тувру. Дидин гьякьнаан Саудияйи гизаф зегьмет зигура. Дурарин терефнаан гьяждиз гъягърударихьна бязи тlалабар а. Дурарикан саб - миненгитдихьан вуйи вакцина, гьаз гъапиш му кьадар инсанар уч шлу йишвахь думу уьзур кубчlвуз аьхю мумкинвал а. Улихьна йисарира думу уьзур кубчlвувалин дюшюшар шули гъахьну. Гьаддиз му Саудияйин асас тlалабарикан саб ву».
«Ич терефнаан гьарйисан гьяжйирихъди духтрарин дестера шула, - гъапну Булат Къурбановди. – Гьадрарихьди учу дармнарра хътаури шулча, асас вуди - аьзарлуйиз сабпи нубатнаан герек шлу дармнар. Эгер аьзарлу больницайиз гъахуруш, Саудияйин терефнаан лазим вуйи сагъ апIбан вари ляхнар гъахуру. Гьяждиз ва уьмрайиз вуйи вари медицинайиз тялукь вуйи харжар Саудияйи чан терефнаан апlура».
Транспортдикан ва гьяжйир гъахбакан
«Гьяждиз гъягъбан кьиматназ, визайихъди сабси, транспортдин гьякьнаан вуйи кьиматра дахил шула - аэропортдиан Мединайин гостиницайизкьан, хъасин Мединайиан Меккайизкьан ва душваъ Минайиз, Аьрафайиз ва Муздалифайиз. Гьамрар вари Саудияйин терефнаан шула», - къайд апlура Къурбановди.
Гьяжйириз вуйи ипlрубдикан
«Ипlрубдин саягъ ва къайда гьадушваъ йишв`ина гъурукьган тяйин апIуруча. Учу дурарихъди апlру йикьрарнаъ, фициб ипlруб дубхьну ккундуш ва гьацира гостиницйириз хувалин, Минайиз, Аьрафайиз хувалин гьякьнаанра улупну шулу. Ич вакилари, фици дурари гьязур апlуруш ва фици ухьухьна рубкьуруш - му ляхин гьарган асас фикриъ гъибтра.
Гьарйигъандин ипlруб саб дархьбан бадали, саб гьяфтайиз вуйи рацион вахт ккимиди дибикlну шулу. Дурари ипlруб гьязур апlруган, душвахь ич вакиларра шулу. Гьаци вушра, саспи вахтари ипlруб варидариз гьудрубкlрира шулу, дициб дюшюш гъабхьибси му суал дишлади гьадушвахь тамамди гьял апIуру».
Гидар гьязур апlбакан
«Гьяжйир хъади гъягъюз ккуни гидарин кьадар аьхюб ву. Дурари вахт ккимиди заявкйир тувру. Дурари аттестация дапlну, хъа экзамен тувру. Гьадрарикан заан кьиматназ экзамен тувдар гидарди ктагъуру ва дурарихъди гьяждин вахт ккебгъайизкьан ляхин гъабхуру. Асас тlалабар: гьяждин гьякьнаан шариаьтдин аьгъювалар ва инсанарихъди гаф-чlал апlуз аьгъювал. Жвувахъди хъайи дестейихъан жаваб тувуз шлувал ва гьацира аьраб чlал аьгъювал. Йислан-йисаз гидарихьна вуйи тlалабар артухъ шула ва диди ужуб натижара тувра».
Гьяжйирихъди аьлакьайикан
«Гьарсаб дестейиз жа-жаради чпин руководителихъди мессенжерариъ группйир дапlна. Думутlанна гъайри, дурарикан гьарсариз компанияйихъди аьлакьа бисузра мумкинвал а. Дупну ккундуки, дурарихъди хусуси аьлакьа айидар руководителар ву ва герек вуйи мялумат учухьна гьадрари рукьуру».
Кьимат
«Кьимат улихь йисандинуб гъубзра. Комбинированный рейс 4790 доллар, прямой рейс 5490 доллар. Доллар айиганси гъубзна, хъа кьимат долларин курсналан асиллу ву».
