Гирами Кьур’андиан 11 дюаь

Гьарсар касди Аллагьу Тааьлайикан чаз ккуниб, чан мюгьтаж’вал айиб ккун апIури шулу. Дугъу чаз ужуб хал кьисмат апIуб ккун апIуз мумкин ву, ясана ужуб машин, дюн’яйин ляхнар ва гьаддихъди варитIан хусуси вуйиб кIваъланра гьапIуз мумкин ву! Дицдар ксарин гьякьнаан Аллагьу Тааьлайи гьамци дупна: «Инсанарин арайиъ анжагъ дюн’яйин ниъматартIан ккун дарапIрудар а, дурар Аьхиратдин ниъматарихъ мягьрум дапIнайидар ву».

Ухьура мицдар касарин арайиан дархьбан бадали, Аллагьу Тааьлайи ухьуз фици Чакан ккун апIуз улупнаш, ари гьаци дюаь дапIну ккунду. Дугъриданна, ихь Халикьдиз ухьуз фу ужи вуш, хъа фтикансана зарар аш, ужуйи аьгъя. Кьур’андиан вуйи дюъйир дурар Аллагьу Тааьлайи ухьуз тувнайи ужувлан ляхнарин ачрар ву. Ухьу му макьалайиъ гирами Кьур’андиан вуйи дюъйирикан кIваин апIидихьа. Къайд: Шариаьтдиинди гирами Кьур’андин аятарин транскрипция бикIуз ихтияр адар, анжагъ дюаь айи аятаритIан ва дурар Кьур’андин аятарси ваъ, хъа дюъйирси дурхну ккунду.

1. «Раббана атина фи-ддунья гьясанатан ва филь-ахирати гьясанатан ва къина аьзаба-ннар» (сура «Аль-Бакьара», 201-пи аят). «Я Аллагь, учуз гьаму дюн’яйиъра, Аьхиратдиъра ужувлар тув, ва учу Жегьеннемдин аьзабнахьан уьрх».

2. «Раббана гьаб ляна мин азважина ва зурриятина къуррата аъюнин важаьльна лильмуттакъина имама» (сура «Аль-Фуркьан», 74-пи аят). «Я Аллагь, ич хпариъ ва наслариъ ич уларин акв апIина ва учу Увхьан гучIрударикан апIина».

3. «Раббана-гъфирлана ва лиихванина-ллазина сабакъуна бильимани ва ла тажаьль фи кьулюбина гъиллян лиллязина аману, раббана иннака Рауфу-рРахим» (сура «Аль-Гьяшр», 10-пи аят). «Я Аллагь, ич ва ич улихьна Увухъ хъугъу жвуван гъардшарин гунгьарин аьфв апIина, ва Увухъ хъугъдарихьна ич юкIвариъ хъял миипан! Я Аллагь! Яв Рягьимлувал, Яв Рягьимвал кьадар айиб дар!»

4. «Раббана ля тузигъ кьулюбана баъда из гьадайтана ва гьаб лана мил-ладунка рагьматан иннака анталь-вагьгьаб» (сура «Алю Имран», 8-пи аят). «Я Аллагь, Уву учу гьякь рякъ’ин алаъган, ич юкIвар гьякьнахьан ярхла мапIан! Яв Рягьимлувал тув учуз! Дугъриданна, Туврур Уву вува!»

5. «Раббана иннана самиъна мунадиян юнади лиль-имани ан амину бираббикум фа-аманна, Раббана фагъфир лана зунубана ва каффир аьнна саййиатина ва таваффана мааьль-абрар. Раббана ва атина ма вааьттана аьля русулика ва ла тухзина явмалькьиямати, иннака ла тухлифульмиаьд» (сура «Алю Имран», 193, 194-пи аятар). «Я Аллагь, учуз Увухъ хъугъувалихъна теклиф апIурайи Пайгъамбарин r дяват гъеебхьунчуз. Учу Дугъахъ хъугъунча ва Дугъаз мютIюгъ гъахьунча. Я Аллагь! Учуз ич аьхю гунгьарин аьфв апIин, ва учу чIуру ляхнарихьан марцц апIин ва ич рюгь яв гьякьлу лукIарихъди адабгъ! Я Аллагь! Уву Яв пайгъамбрарихьанмина учуз тувурза гъапиб тув, учу исккан мапIан, дугъриданна Уву туву гаф чIур апIрур дарва».

6. «Рабби-гъфир варгьям ва анта хайру-ррагьимин» (сура «АнНур», 118-пи аят). «Я Аллагь, гунгьарин аьфв апIина ва узуз рягьим апIина, дугъриданна, Уву варитIан Рягьимлур вува!»

7. «Раббиргьямгьума кама раббаяни сагъира» (сура «Аль-Исра», 24-пи аят). «Я Аллагь, дурариз (йиз абйирбабариз) рягьим апIин, дурари узу бицIиди имиди рягьимлувалиинди арайиз адаъну»

8. «Раббана ла туахизна ин насина ав ахтIаъна, раббана ва ла тагьмиль аьляйна исран кама гьямальтагьу аьлаллазина мин кьаблина. Раббана ва ла тугьяммильна ма ла тIакьата лана бигьи ваъфу аьнна вагъфир лана варгьямна, анта мавлана фансурна аьляль кьавмиль кафирин». «Я Аллагь, учу кIваълан гьаъган, учкан гъалатI ктубчIвган, учуз аьзаб мутувана. Я Аллагь, Ич улихьна вуйидариин Уву илипуб, уч’ин миилипан. Я Аллагь, уч`ин учхьан даршлуб миилипана. Учуз аьфв апIина, Рягьим апIина. Уву ич Агъа вува. Учуз мусурман дару ксариин гъалиб хьуз кюмек тува».

9. «Рабби авзиъни ан ашкура ниъматака-ллати анаьмта аьляййа ва аьля валидаййа ва ан аъмала салигьян тарзагьу ва адхильни бирагьматика фи ибадика-ссалигьин». «Я Аллагь, Уву узуз ва йиз абйир-бабариз туву ниъматарихъан узуз гьямд апIуз кюмек тува ва Уву рази шлу ляхнар апIузра. Яв рягьимлувалиинди узу яв гьякьлу лукIарикан апIина».

10. «Рабби-жаьльни мукьима ссаляти ва мин зуррияти. Раббана ва такьаббаль дуаьи. Раббана-гъфир ли ва ливалидая ва лильмуъминина явма якьумуль гьисаб». «Я Аллагь, Узура, йиз насларра гъудган апIрударикан апIина. Я Аллагь, Йиз дюаь кьабул апIина. Я Аллагь, Йиз ва вари мусурмнарин аьфв апIина (Гъиямат йигъан)».

11. «Раббана ля тажаьльна фитнатан лиллазина кафару вагъфир лана раббана иннака анталь аьзизуль гьяким». «Я Аллагь, учу кяфирариз имтигьянди мутуван (кяфирариз ич зиин гъалибвал мутуван, дици гъабхьиш дурари чпи гьякь рякъ’ин алча кIури, фикир апIиди) ва ич аьфв апIина. Я Аллагь, дугъриданна Уву Аьзиз вуйир, Гьяким вува!»

ФАТИМА МЯГЬЯММАДРАСУЛОВА