Шейтlниз багахь хьуз манигъ`вал апlру дюаь

Шейтlан инсандин варитlан чlуру душмнарикан ву, думу гьарган инсандихьна багахь хьуз чалишмиш шулу ва саспи вахтари ифдин табариъдира кмиди либцуру.

Шайтlни, мялум вуйиганси, инсандин фикриз тясир тувру ва думу ужудар дару ляхнарихъна, гунгьарихъна хуру. Амма инсанди Аллагьу Тааьла кlваин гъапlган, думу яваш шулу, хъа «ауьзу» гъурхган думу инсандихьан ярхла шулу. Гьаддиз, инсан Аллагьу Тааьла кlваин апlбахьан ярхла хьубси, дицир кас шейтlнин тясирнакк шулу ва гьякь рякълан улдугуз гъитру.

Гирами Каламдиъ дупна: «Фуж Рягьимлу Аллагь кlваин апlувалихьан ярхла шулаш, дицирихьна Ухьу шейтlан гьапlдихьа ва думу дугъан дуст хьиди». (сура Аз-Зухруф, 36)

Яни дугъахъди гьарган дуст-шейтlан шулу ва, гьарвахтна дугъан кIваъ чlуру фикрар-хиялар ирчри, думу гунагьнан ляхнарихъна хуру, гьялалихьан - ярхла, хъа гьярамдихьна багахь апIуру.

Гьаддиз шлукьан гизаф Аллагьу Тааьла кlваин апlури духьну ккунду. Гьаци гъабхьиш, шейтlнихьан багахь хьуз даршул.

Абу Гьурайрайи Пайгъамбарин () гафар хура: «Гъудгниз экбер тувруган, шейтlан, авара дубхьну, экбрин сес деребхьбан бадали ярхла шулу, экбер ккудубкlган, хъанара багахьна чалишмиш шулу. Гьацира думу икьамат урхруган ярхла шулу, думу ккудубкlган, хъанара дуфну, инсандинна дугъан кlван арайиъ дугъубжвну, кlуру:“Гьаму фулану-фулану ляхнарикан фикир апlин”. Гьамци гъудгник кучlвайиз кIваинкьан алдру ляхнарикан кIваъ фикрар ирчну, инсан гьамрариин машгъул апIуру, дугъу швнуб рякааьт гъапlнуш-гъапIундаш кlваълан гъябгъбан бадали». (Муслим)

Шейтlнихьан жвув уьрхбан бадали улупнайи жюрбежюр дюъйир ва азкарар а. Эгер дюаьйикан кlуруш, Абу Тайгьайи хабар тувраки, саб ражари сар касди Аьбдуррагьман ибн Ханбашийихьан гьерхру: «Пайгъамбарихьна () шейтlнар гъафиган, дугъу фу гъапlнийи? Аьбдуррагьманди жаваб тувру: Шейтlнар Пайгъамбарихьна () жюрбежюр йишвариан гъафну: дагъларилан, гъарзаригъян, дюзенарилан - ва дурарин арайиъ хилиъ чирагъ айирра айи, дидиз факелихъди Пайгъамбар () ургуз ккун гъабхьну.

Дурар гъяркъган, Пайгъамбар () кьяляхъ гъягъюз хъюгъю. Думуган дишлади дуфну, Жабраил малаикди гъапну: «Я Мугьяммад, йип!” Пайгъамбари () гьерху: “Фу пуза?” Жабраил малаикди гъапи: “йип:

أَعُوذُ بِكَلِمَاتِ اللَّهِ التَّامَّاتِ الَّتِي لا يُجَاوِزُهُنَّ بَرٌّ وَلا فَاجِرٌ مِنْ شَرِّ مَا خَلَقَ وَذَرَأَ وَبَرَأَ , وَمِنْ شَرِّ مَا يَنْزِلُ مِنَ السَّمَاءِ وَمِنْ شَرِّ مَا يَعْرُجُ فِيهَا , وَمِنْ شَرِّ مَا ذَرَأَ فِي الأَرْضِ وَمِنْ شَرِّ مَا يَخْرُجُ مِنْهَا , وَمِنْ شَرِّ فِتَنِ اللَّيْلِ وَالنَّهَارِ , وَمِنْ شَرِّ كُلِّ طَارِقٍ إِلا طَارِقًا يَطْرُقُ بِخَيْرٍ يَا رَحْمَنُ

«Аьуьзу бикалимати Ллагьи т-таммати л-ляти ля юджавизу-гьунна баррун ва ля фаджирун мин шарри ма халякьа ва зараа ва бараа, ва мин шарри ма янзилу мин ас-самаи ва мин шарри ма яъружу фигьа, ва мин шарри ма зараа фи ль-арзи, ва мин шарри ма яхружу мингьа, ва мин шарри фитани л-лайли ва н-нагьари, ва мин шарри кулли тlарикьин илля тlарикьан ятруку би-хайрин, я Рагьман!»

Ва Аллагьу Тааьлайи шейтlнарин цlа ктlубшвну ва сабкьан имдарди дурар вари тlанкь гъапlну». (Тlабарани)

Анас асгьябди гьацира Пайгъамбарин () гафар хура: «Фунури, хул’ан удучlвруган, гъапиш:

بِسم الله تَوَكّلْتُ على الله وَ لا حول و لا قُوة إلاّ بالله

«Бисми Ллагьии таваккальту аьля Ллагьи ва ла гьявля ва ла кьуввата илла би-Ллагь»

«Аллагьу Тааьлайин ччвурналан, Аллагьу Тааьлайиина таваккал апlураза, гунагьнахьан ярхла хьуз ва ибадат апlуз кьувват анжагъ Аллагьу Тааьлайихьан вуйиб ву», хъа малаикари кlуру: «Уву вари чlуруваларихьан уьрхидиву ва уву гьякь рякъюъди гъягъидива» (Абу Дауд).

Гьацира шейтlнин чlуруваларихьан уьрхюз Аят-уль-Курси, Аф-Фалякь, Ан-Нас ва гьацира жара аятар, сурйир урхуб ужу ву. Эгер инсан гьарган гъудгнин дижикlну гъахьиш, ари гьадмура себеб шулу.

Гьарсаб урхру дюаь, азкарар ихласвалиинди ва кlваантlан дурхну ккунду, саб мелзналан алдаъну гъитруганси ваъ. Гьаддиз учву апlру дюъйириъ кlваантlан Аллагьу Тааьлайикан жвув ва жвуван хизанар ва гьацира вари мусурмнар шейтlнин писваларихьан, васвасарихьан уьрхюб ккун дапlну ккунду.

АНСАР РАМАЗАНОВ