Студентариз насигьят

Магьа гьаму вазлин аьхириъ гизаф баяр-шубар урхуз кучlвуз жара шагьрариз гъягъиди. Жвуван хал-йишв гъибтну, жара йишвариз гъушган, инсанди чав гъахьи йишв, душван ужудар аьдатар ва инсанвалин лишнар гьархну ккундар.

Саспи студентарин гьякьнаан дурар урхурайи йишвариан чухсагъул кlуру кагъзар хътауру, хъа саспидарин терефнаан наразивалар арайиз гъюру.

Ухьу наан гъахьишра, жвуван мусурманваликан кlваълан гьаъну ккундар. Жвувахьинди гъилигиган, тмуну касди, магьа гьамцир духьну ккунду мусурман кас, кlуруганси гъузуз чалишмиш йихьай. Гьяйифки, саспидарин фикир шулуки, магьа абйир-бабарра багахь хьтар, узу аьгъюдарра хьтар ва мушваъ жвуваз фу ккундуш, гьадму вари апIуз шулу. Ваъ, дици дар. Эгер уву шлизкlа рякъюрадаршра, увуз аьгъюдар адаршра, Аллагьу Тааьлайиз вари рябкъюрайиваликан кlваълан магьапlан.

Шубарихьна илтlикlурира пуз ккундузуз, учву хъанара артухъ ихтиятди духьну ккун. Гьарсаб алдабгъру лик фикирлуди дубхьну ккун. Урхуз гъушу йишваъ жвуваз аьгъдру ляхнар гизаф алахьур, амма жвуван абайина бабаз, жвуван диндиз гаф гъюру ляхин дубхьну ккундар.

Жюрбежюр аьгъювалар гъадагъуб - му ужудар ляхнарикан ву. Жвувлантина имбударизра аьгъювалар тувуб хъанара ужи ву. Гьаддиз учву наан урхурашра, заан хъуркьувалар улупай, ичв абйир-бабар, гъул-жямяаьт рази апIру ва мянфяаьт тувру инсанарикан йихьай.

Урхубра ккудубкlур, хъасин ляхниъра дугъужвур – гьаму вари дюшюшариъ варитlан заанди вуйиб инсанвал кади, гьюрмат ади, гунгьарихьан ярхлади гъузуб ву.

Сабсана насигьят учвуз! Учву наан урхурашра, фициб факультетдиъ ашра, гьаддихъди сабси диндин аьгъюваларра гъадагъай. Йигъандин вахтна думу дарсариъ шлуган, хябяхъган диндин дарсариз гъягъюри гъахьиш, кьюбиб терефарра тамам шул.

Фуну ляхнин специалист гъахьишра, эгер диндин аьгъювалар аш, гьялална-гьярам жара апlуз, шариаьтдихъди гъягъюз рягьятди шул.

Пайгъамбарин () гьядисдиъ дупнаки, илим дубгъуб, аьгъювалар гъадагъуб гьарсар мусурман касдин фарз ву. Яни ухьу фу ляхнин эйси гъахьишра, ухьу жвуван фарзарикан аьгъю дапlну ккунду. Му ухькан тlалаб апlурайи ляхин ву.

Гъит Аллагьу Тааьлайи ухьуз варидариз ихь жямяаьтдиз, халкьдиз мянфяаьт тувуз тавфикьвал, кьувват туври. Жямяаьтдиз мянфяаьт тувру ксарикан Аллагьу Тааьлара рази шул.