Цlийи йисаъ учlвнахьа!
Ассаламу аьайкум, гьюрматлу ватанагьлийир! Магьа гьижрайиинди 1448-пи йис улубкьна. Мугьяррамдин ваз цlийи йисандин сабпи ваз ву. Му вазлин дахилнаъ гирами Аьшурайин йигъра а. Мусурман касдиз му ваз лап заануб ву.
Гьарсар касди чан ккудубшу йисандин натижйир адагъну ккунду, ва думу йисан гъахьи гъафилваларин, нукьсанваларин, гунгьарин аьфв дапlну, гьаму улубкьнайи цlийи йисан дицдар гъалатlарихьан ярхла духьну, сацlиб вушра Аллагьу Тааьлайихьна багахь хьуз чалишмиш духьну ккун.
Мусурман кас гьарсаб вахтна сацlиб вушра артухъди Аллагьу Тааьлайихьна багахь хьуз чалишмиш шлударикан духьну ккунду.
Му цlийи йис ккудубшу йистlан ужуди кlулиз адабгъуз ният дапlну ккун.
Думу ниятнаъ ади ккунду, саб кlуруб, Пайгъамбар ﷺ бабкан гъахьи вазлихьна ужуди гьязур хьуб, думу ваз ужуди адапlуб, дидин кьядляхъ хъасин - гирами Рамазандин ваз. Ухьуз аьгъюганси, вари вазарикан варитlан заанди дебккнайиб Рамазандин ваз ву. Му вазлин арайиъ гьарсар касдиз, артухъдиси ибадат апlури, Аллагьу Тааьлайихьна багахь хьуз мумкинвал шулу. Му вазлиъ мумкинвал айидариз Уьмрайиз гъягъюбра ужи ву. Аьхю ужара айи ляхин ву.
Гьацира му йисан гьелелиг гьяж тамам дапlну адру ксари шлубкьан дина гъягъюз ният дапlну ккун. Му ляхниз дикъат фикир тувай, ватанагьлийир. Гъийин девриъ Аллагьу Тааьлайи инсанариз гъазанмиш апlуз мумкинваларра тувна, гьаддихъди сабси эгер ухьу жвуван гьяж ва уьмра апlурдарш, ихь терефнаан Аллагьу Тааьлайиз гьямд адрувал шула.
Эгер гьяждиз гъягъюз кьувват гьубкlрадарш, гъит уьмрайиз гъарахри. Уьмрайиз гъягъюз гизафдариз мумкинвалар а, амма дюн’яйин ляхнари ккагъувалиан чпиз дицдар мумкинвалар адарчуз кlури дусна.
Жвуваз Аллагьу Тааьлайи хал-йишв тувган, ужуб машин кьисмат гъапlган, жара ниъматар тувруган, жвуван терефнаан Аллагьу Тааьлайиз гьямд апlувал адруган, думу ужуйи шулдар.
Магьа гьаму йисандин эввелариъ инсанди гьаму ляхнарикан фикир дапlну ккунду. Му мубарак ният тамам апlуб сифтейиан, йишвандин арайиъ тагьажуд суннат дапlну, дидин кьяляхъ жвуваз ва имбу вари мусурмнариз ужуб дюаь апlбалан ккебгъну ккунду.
Аллагьу Тааьлайин кьадар адрубкьан аьхю рягьимлувалар а. Лигайчва, ухьу фукьан чlуру ляхнар апlурашра, фукьан гунгьар апlурашра, Чаз аьссивал апlурашра ухьу Чан рягьимлувалихьан ярхла апlурадар. Ухьуз гъазанмиш апlуз мукинвал тувра, ухьуз гьялал ризкь тувра. Хъа гьамус суал: хъа ихь Халикь рази ктауз ухьу гьапlрайкlан? Му суалнакан ухьу фикир гъапlнийкlан? Гизафдари ваъ, саспи дюшюшариъ ихь фикир шулу вари жвуву гъазанмиш гъапlуб ву, жвуван хилариинди ву, хъа Аллагьу Тааьлайи туврайибдикан кlваълан гьаъру.
Гьаддиз, гъачай ихь вари гъахьу гунгьарин, нукьсанваларин Аллагьу Тааьлайикан аьфву ккун дапlну гьаму цlийи 1448-пи йис шлубкьан Аллагь рази шлуганси адапlуз ният апlухьа.
