Имамариз гирами Кьур’андин курсар

Гирами Калам урхуз аьгъю апIуб мусурман касдин метлебарикан саб ву. Саспи инсанари му ляхниз асас фикир тувра, хъа саспидари кагьалвал апIури шулу. Дикъатниинди фикир тувиш, Пайгъамбарихьанмина ﷺ ухьуз гъубзнайи варитIан заануб гирами Кьур’ан ву.

Гьадму ляхин хъанара заан дережайиинди кIулиз адабгъуб метлеб вуди, Табасаран райондин имамарин советди Йемендиан вуйи гирами Каламдин гьяфиз, шейх Ибрагьим аз-Зубайжийиз ихь юрдариз теклиф гъапIну.

Магьа 10 йигъандин муддатнаъ (1-10 июнь) Хючна гъулаъ гьарйигъан 50-тIан артухъ имамар ва гьацира гьяфиздихь чпин урхурайибдин къайда фициб вуш лигуз ккунидар вари гъафну.

Дишлади пуз ккундузузки, му курсарикан имамариз аьхю мянфяаьт гъабхьну. Чпиз фукьан зурба хайир гъабхьнуш, гьарйигъан дарсназ гъюри гъахьи имамари аьхю аьшкьниинди ктибтуйи.

ДумутIанна гъайри, йигъандин муддатнаъ дарсар кивбахьна лавландинна хъитIирхбандин гъудгнарин арайиъ шейх табасаран райондин жюрбежюр гъулариз вяъзйир апIуз гъягъюри гъахьну. Гьаму 10 йигъандин арайиъ гирами Каламдин гьяфиз магьа гьаму гъулариз гъушну: СтичI, Жулжагъ, ЖагътIил, ГьепIил, Гьесихъ, ЧвулатI, Ерси, Халагъ, Заан Ягъдигъ.

Му гъулариъ, инсанар мистаз уч духьну, шейхди гирами Каламдикан ктибтруган, вари дикъатлуди хъпехъуйи.

Имамарин гьякьнаан кIуруш, дурари мялимди туву вари табшуругъар тамам дапIну, экзамен тувнийи.

Экзамен заан дережайиинджи тувдариз курсар кIули гъахбан сертификатарра тувну.

Имамари чпин терефнаан му курсар тешкил апIбаз себеб гъахьидариз аьхю чухсагъул къайд гъапIну.

Гележегдиъра ухьухьна, ихь имамарихьна гьамци заан адлу, хъуркьувалар айи аьлимар, шейхар хъади дуфну, дурарикан ихь имамариз, ватанагьлийириз мянфяаьт шул кIури, умуд киврухьа.

Шейх Зубайжийи ихь имамариз заан кьимат тувну ва, гележегдиъ хъанара чаз ихь юрдариз гъюз мумкинвал шул кIури, умуд кивну.

Гъит Аллагьу Тааьлайи ухьуз мицдар аьлимарикан артухъди илим бисуз тавфикьвал туври, гъит Аллагьу Тааьлайи ухьуз гирами Калам гъалатIар ктарди, заан дережайиинди эзбер апIуз тавфикь туври.