Табасаранлуйир Астрахандиъ

Табасаранлуйир Астрахандиъ

21-пи сентябриъ Табасаран райондиан 50-ихьна инсанар адлу аьлим, Накьшубанди тlарикьатдин шейх Мягьмуд афандийин Астрахань шагьриъ айи зияратдиз гъушну.

Думу йигъан гвачlнин ухди рякъюъ учlву табасаранлуйир лисундин гъудган апlуз Кочубей гъулаъ дугъужвну. Думу гъулан имам Аьбдулла гьяжийи, ярхлаан хялар гъюра кlури гъеебхьган, дурариз ипlруб гьязур дапlну, заан дережайиинди кьабул гъапlну.

Лисундин гъудган гьадушваъ дапlну, ипlрубдихъдира тухъ духьну рякъюъ учIву табасаранлуйирин десте магьа хябяхъган сяаьт йирхьубдиз Астрахань шагьризра хъубкьнийи.

Думу йигъан Астрахандиъ «Золотое кольцо» кlуру банкетный залиъ табасаранлуйирин Пайгъамбариз ﷺ бахш вуйи аьхю мажлис айи. Сабпи нубатнаан вари десте гьаму серенжемдиз гъушну. Табасарандиан гьаму кьадар инсанар гъювалиан Астрахандиъ айи табасаранлуйир лап шад вуйи.

Гирами Каламдиан аятар урхбиинди магьа мажлис ачмиш гъапlу.

Мажлиснаъ насигьятнан гафар апlури, Пайгъамбарин ﷺ уьмрикан ктибтури ва улхбарин арайиъ мавлидар-назмар урхури гъахьну.

Мажлиснан кьяляхъ варидари сатlиди Мягьмуд Афандийин накьвдихьна зиярат гъапlну.

Вари жямяаьтдихъан дюаь дапlну, кlваантlан Аллагьу Тааьлайикан ислягьвал ккун дапlну, Астрахандиз дуфнайи хялар кьяляхъ хътакну.