Чиб-чпихьна сабурлувалиинди янашмин йихьай
Адашиз сар хъпебехъру чIуру бай ади гъахьну. Дугъу кми-кмиди абйир-бабариз гиран ктапIуйи. Гьар ражари бали чаз гиран ктапIган, адаш жара хулазди учIвну, душван цIализ ккум йивури гъахьну, гьаци чав сабурнахъна гъюз кIури. СацIиб вахтналан думу цалик ккум йивуз йишв кимдайи.
Саб ражари бай фици-вуш думу хулазди учIвган, дугъаз вари цал ккумарихъди кабцIну рябкъюру. Мюгьтал гъахьири, му фу вуйкIан кIури, гьерху. Адаши жаваб туву: «Гьар ражари уву узуз гиран ктапIган, узу саб ккум йивури гъахьунза!..» Швумал гъахьи бали адашикан ккун апIуз хъюгъю: «Хил алдабгъ, адаш, узу увуз гиран шуваликан фикир апIури гъахьундайза! Гьаму йигъланмина уву анжагъ рази ктаидизаву ва гьар ражари узхьан уву рази ктауз гъабхьиган, цалиъ айи ккумар са-сабди адагъуз хъюгъ».
Бали чав туву гаф тамам апIуз хъюгъю ва улубкьну гьациб йигъ - цалиъ сабкьан ккум имдруб. Думуган дугъу чан адашиз шадди гъапну: «Гьямд ибшри Аллагьдиз, магьа сабкьан ккум имдар!» Хъа адаши гъапну: «Рябкъюравузки йиз бай, ухьу ккумар адагъунхьа, хъа урхъар ими… Ва му цал сарун улихьгандинубси чIварчIвлиб гьичра даршул. Ав, йиз иццрушин сарун имдар, амма зийнар сагъ шуладар. Уву хъасин фукьан ужувлар гъапIишра, гьарсаб туву дердну чан шил гъибтра…» Магьа 2020 йис улдубчIвну гъубшну, дидира чан шил гъибтну. Гизафдарин хизанариан коронавирус кIуру уьзриан багахьлу инсанар гъушну…
Уларизкьан дярябкъру вирусди вари дюн’я кьамкьариин дитну. Ва гъи гьич сарихьанра, учв думу уьзриан иццру даршул, пуз шулдар. Гьич сар гьюкумдарихьанра чан халкь дидхьан уьбхюз шуладар. Саризра гьапIруш аьгъдар, вари жандиъ гучI ади дусна. Думу гьялнаъ анжагъ Аллагьу Тааьлайик умуд кивну, дугъкан ккун апIури чпин аьзарлуйир сагъ шул кIури йигъдийишвди дюъйир апIури гъахьну… Магьа 2021 йис улубкьна... му йисан му чIуру уьзриан ухьуз мукьадар манигъ`валар даршул кIури, умуд киврахьа. Ужувлиинди ибшри кIури, Аллагьу Тааьлайикан ккун апIидихьа. Амма улхьан йисари ухьуз алахьу читинваларикан, Аллагьу Тааьлайи туву имтигьянарикан кIваълан гьапIурдархьа. Гьаз мици гъабхьнийкIан? Гьаз йиз хизандихъди гьарган чIуру ляхнар шуйкIан, кIуру суалариз ихь фикрариъ йишв тувурдахьа. Дицдар фикрар апIайиз, гъачай сабпи нубатнаан, Аллагьу Тааьлайин улихь ухьу фукьан чIуру ляхнар, гунгьар апIураш, лигухьа. Гъачай багахьлуйириз, мирасариз ужудар хьухьа, дурариз гьюрмат апIухьа. Ухьу гьаму дюн’яйиин яшамиш шулайи гьарсаб дакьикьа акуб ва шадлуб апIурхьа.
МАРИЗА МЯГЬЯММЕДОВА
