Бицlидарин Рамазандин ваз
Пагь йиз сабпи Рамазандин ваз! Думу гьич кlваълан гьархруб дар. Гьар йисан Рамазандин ваз багахь шлуган, узуз йиз бицlи вахтар кlваин шулзуз.
Кьюрдун йигъар вуйи. Рамазандин ваз ккебгъубси, адашикан ва дадайикан узу сигьринган нивк’ан уягъ апlуб ккун апlури шуйза. Дурари, ибшри кlури, жаваб тувуйи, амма хъергурдайи. Фукьан дурариз йиз язухъди гъабхьнушра, магьа сад йигъан дурарин сесери узу уягъ гъапIнийи. Гьадрарихъди сатlиди уьл дипlну, гьадму йигъан лисузкьан ушв гъибисунза, хъа думутlан артухъ гъабхьундайзухьан. Гьаци вушра лисунган уьл дипlну хябяхъган ушв гьибтру вахтназкьан сарун фукlа гъипlундарза, имбударихъди ушв гьибтуз кlури.
Я Аллагь, фукьан гюрчегди думу вахт гьамус кlваин шулзузки. Гьиринган сатlиди сюгьриз гъудужвуб, хябяхъган варидари сатlиди ушв гьибтув – лап кlваз хуш шлу ляхин ву.
Гьамдихъди пуз ккундузузки, ичв веледаризра гьаму бицlивахтнан Рамазандин вазлин ниъ кубкlуз гъитай.
Саспи абйир-бабари, учву лап бицlиди имичва, кlури, дурарихьди ушвар дисуз гъитри шулдар, хъа йиз фикриан эгер ухьухъди сюгьюриз (сухур) гъудужвури гъахьиш, гьеле ярхи йигъ ушв бисуз гъабхьундаршра, ухьухъди ушв гьибтуз гъитри гъахьиш, чпин вари уьмриз думу кlваинди гъубзру.
Гьадму къайдайиинди дурар яваш-явашди ушвар дисури вердишра шул. Хъасин дурарин, ушв бисуб фарз ву, кlури кlваин апlуб герек хьибдар.
Гъи гьямд ибшри Аллагьдиз (*), ушв бисрударра гизаф ву, амма гьяйифки саспидариз хабаркьан адар. Дурариз Рамазандин ваз имбу вазарихьан фаркьвал ади рябкъюрадар. Гьаз дици вуйкlан? Сабпи нубатнаан абайин-бабан тахсирнаан. Вахтниинди веледдиз му фарзарикан мялумат туврадар, белки чпира ушв бисури гъахьундаршул, веледарра думу ляхнихьан ярхлади ву.
Абйир-бабариз веледарикан гизаф фикир кади шулу: дурарин сагъвал, дурарин урхувал, хъасин вузар ва гьаци жара ляхнар. Хъа гизафдари жвуван веледдин диндин цIиб-аьхюб фикиркьан туври шулдар.
Гъачай гьамус суал тувхьа: гъиямат йигъан Аллагьу Тааьлайин улихь ухьу фици жаваб тувуйкlан? Жвуван веледари ухьуз тягьна кипруган ухьу гьапlуйкlан?
Гьаму суаларикан ухьу фикир дапlну ккунду. Гирами Рамазандин ваз йискьубан арайиъ айи вахтарикан му суалариз фикир тувуз варитIан ужуб ву. Жвуван хал-хизандихъди сатlиди дусну, ибадат апlури, ушвар дисури, таравигь-гъудгнар апlури, садакьа туври, мискинар-факьирариз кюмек туври гъахьиш, Аллагьу Тааьла ухькан фукьан вушра рази шул. Рамазандин вазли гъибису саб ушвнахъан шлу савабнан кьадар гьадмукьан аьхюб шул, гьеле дидин кьадар саризкьан аьгъдар, анжагъ Сар Аллагьдизтlан. Лигайчва!
Ухьуз гьаму жилиин ихь веледар варитlан шадудар, бахтлудар духьну ккундухьуз, ва дурар гьаци хьпан бадали гизаф зегьметра зигури шулхьа. Хъа ухьуз дурар аьхиратдиъра варитlан шадудар, бахтлудар духьну ккундаринхъа? Эгер ккундуш, ухьу дурар аьхиратдиз шаду агьларикан хьпан бадали фу гъапlнийкlан?
Гъит Аллагьу Тааьла ухьуз му ляхнариз фикир тувуз кюмек ишри.
