Кафнигъ руг гьаз гъябхьри шулу?
Суал: Кечмиш духьнайир фаракьат апIру ляхнарин гьякьнаан дустарихъди гизаф суалар арайиз гъюрайич. Саспидари хлиъ руг дибисну, гьаддиина сура «Аль-Кьад» (Инна анзальнагьу) урхури шулу ва гьацира, саб кIажук дюаь дибикIну, кафнигъ гъиври шулу. Гьамдин гьякьнаан фу пуз шулу?
Жаваб:
1. Шафии мазгьабдин аьлимари кIураки, ругдиина 7 ражари сура «Аль-Кьадр» дурхну кафнигъ гъябхьиш, Аллагьу Тааьлайин амриинди дицир касдиз накьвдин аьзабнахьан рягьятвал шул.
2. Саб дюаь, Аллагьдин ﷻ ва Пайгъамбарин ﷺ ччвурар дидикIнайи кIаж кафнигъ гъивуз хай шулдар, гьаддик нежес, ясана жара марцци даруб фукIара кубкIуз мумкинвал аш. Эгер чиркин кубкIрадарш, яни саб хъябкью бицIи гъабраъ вая путулкайиъ ивиш, дици апIуз хай шулу.
Далил:
«Имам Ан-Наширийи далил хураки, эгер шликIа инсан фаркьат апIуз гьязур дапIнайи накьвдиан вуйи руг дибисну, дид’ина 7 ражари «аль-Кьадр» сура гъурхиш ва думу руг кафнигъ гъивиш, думуган Аллагьу Тааьлайин амриинди кечмиш духьнайириз накьвдин аьзаб хьибдар». (Лиг: Гьяшия аль-Бужайрами, т. 2, 587).
«Ибн Гьяжар аль-Гьайтамийин «Шаргь аль-Убаб» китабдиъ дупнаки, шликIа «аль-Амн»(1) дюаь дибикIну, чиркин кудрубкIуз гъургъушмигъян гъибиржну, кафнигъ кечмиш духьнайирин мухриин иливиш, кечмиш духьнайириз накьвдин аьзабнахьан рягьятвалар хьибди…». (Лиг: Сулейман аль-Джамаль, Гьяшия аль-Джамаль, т. 2, с. 203).
«Эгер Аллагьдин ﷻ ччвурар, ясана жара гирами гафар чиркин шулуш, зиихъ дупнайиб хай шлуб дар, гьаз гъапиш думу заанди дебккнайиб исккан апIувалик гьисаб ву. Эгер гьадму дибикIнайибдик чиркин кудрубкьруб увуз якьинди аьгъяш, думуган хай шулу». (Лиг: Ибн Гьяжар, аль-Фатава аль-Кубра, т. 1, с. 398).
(1) «аль-Амн» – думу накьвдин аьзабнахьан уьрхбан бадали урхру хусуси дюаь ву.
