ШейтIни туву насигьятнан гаф
Му аьламатнан дюшюш Пайгъамбарин ﷺ асгьяб Абу Гьурайрайихъди гъабхьиб ву. Думу касдиз мусурмнарин уч гъапIу закатуль фитIрайиз лигуб табшурмиш дапIнайи. Му табшуругъ тамам апIури айи Абу Гьурайра фици-вуш шейтIнихъди гюрюшмиш гъахьну…
Имам Бухарийихьан вуйи Пайгъамбарин ﷺ гьядисдиъ Абу Гьурайрайи гьамци ктибтура:
«Саб ражари Рамазандин вазлин инсанари туву ушварин сэъ уьбхюз Пайгъамбари ﷺ табшурмиш гъапIнийзуз. Амма сацIиб вахтналан сар касди душваъ уч дапIнайибдикан чаз гъабхури гъябкъюнзуз. Узу думу дидисну, гъапунза: «Валлагьи, узу уву Пайгъамбарихьна ﷺ хъади гъягъидиза!» Дугъу гъапну: «Дугъриданна, узу мюгьтаж’вал айир вуза, гизаф бицIидар азуз, читин гьялнаъ айир вуза!»
Дици гъапиган, думу деетунза, хъа гвачIнинган Пайгъамбари ﷺ гьерху: «Я Абу Гьурайра, уву гъидисурин гьял накь фици вуйи?» Узу жаваб тувза: «Я Расулаллагь, дугъу аьхю мюгьтаж’вал айиз гъапну, гизаф бицIидарра азуз гъапну ва узу думу деетунза». Пайгъамбари ﷺ гъапну: «Дугъриданна, дугъу увуз кучIлар гъапIну ва думу хъанара увухьна гъиди». Гьамци думу хъанара гъюруваликан Пайгъамбари ﷺ хабар тувунзуз ва узу дугъаз ккилигури гъахьиза.
СацIиб вахтналан думу хъанара гъафиган, дидисну гъапиза: «Дугъриданна узу уву Пайгъамбарихьна ﷺ хъади гъягъидиза!» Дугъу жаваб туву: «Увуз аьгъявуз йиз мюгьтаж’вал айиб, гизаф бицIидар айиб. Деет узу, хъа сарун гъидарза!»
Дугъан язухъ дапIну деетунза, хъа гвачIнинган Пайгъамбари ﷺ гьерху: «Я Абу Гьурайра, уву гъидисурин гьял фици ву?» Узу жаваб тувза: «Я Расулаллагь, дугъу аьхю мюгьтаж’вал айиз, бицIидар гизаф азуз гъапиган, язухъ гъабхьири, деетунза». Пайгъамбари ﷺ гъапи: «Дугъриданна, дугъу увуз кучIлар гъапIну ва думу хъанара гъиди».
Магьа думу шубубпи ражари гъяйиз ккилигури гъахьунза ва думу, дугъриданна, гъафну, чаз ипIруб уч апIуз хъюгъну.
Узу думу дидисну, гъапиза: «Гьамус узу уву якьинди Пайгъамбарихьна ﷺ гъахидизаву, гьаз гъапиш уву узуз, сарун гъюрдарза кIури, шубуб ражари кучIлар гъапIунва!»
Думу касди гъапи: «Узу деет, хъа узу увуз гьацдар гафар улупидизавуз, Аллагьу Тааьлайи дурарикан увуз мянфяаьт туврусдар!» Узу гьерхза: «Фу гафар вуяв?» Дугъу жаваб туву: «Уву нивкIуз гъягъруган, ккебгъну ккудубкIайиз «Аятуль Курси» урх, эгер уву гьаци апIури гъахьиш, увухъди гьарган Аллагьу Тааьлайин малаик хьибди, хъа гвачIнинган уягъ хьайизкьан шейтIнихьан увухьинди гъюз хьибдар!»
Гьамци гъапиган, узу думу хъанара деетза. Хъа гвачIнинган Пайгъамбари ﷺ дугъан гьякьнаан гьерхган, узу гъапиза: «Я Расулаллагь, дугъу узуз, Аллагьу Тааьлайи увуз мянфяаьт тувру гафар улупурзавуз, эгер узу деетуруш, гъапну, ва гьадмуган деетунза». «Хъа фу гафар вуйи?», - гьерху Пайгъамбари ﷺ. Узу жаваб тувза: «Дугъу узуз гъапну: «Дахъруган ккебгъну ккудубкIайизкьан «Аятуль Курси» урх», ва гьацира гъапну: «Увухъди гьарган Аллагьу Тааьлайин малаик хьибди, хъа гвачIнинган уягъ хьайизкьан гагьди шейтIнихьан увухьна гъюз хьибдар!»»
Узухъ хъебехъну, Пайгъамбари ﷺ гъапну: «Дугъу, дугъриданна, увуз гьякь гафар гъапну, гьелелиг учв кучIлях вушра! Му шубуд йишван увухъди гафар апIурайир фуж вуш аьгъянуз, я Абу Гьурайра?» «Ваъ», - кIури жаваб тувза. Думуган Пайгъамбари ﷺ гъапи: «Думу шейтIан чав вуйи».
«Аятуль Курси» – «аль-Бакьара» сурайин 255-пи аят ву:
اللَّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِندَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ
Дугъриданна, му гирами Каламдин лап мяна айи ва варитIан заан вуйи аятарикан ву. Му аятдин заанваларикан кудухну ккудубкIуз даршул. Гьаци вуйиган, шлубкьан артухъ му аят урхай. Ичв бицIидаризра му урхуз аьгъю апIинай.
