Рамазан – 2025

Магьа гирами Рамазандин ваз улдубчlвну. Гьарсар мусурман кас му вазлиз ккилигури шулу, хъа улдубчlвруган кlваъ пашманвал шулу. Му гирами вазлин арайиъ ихь аьхю уьлкейин жюрбежюр йишвариъ Рамазандин вазлиз гюре вуди гизаф мажлисар-ифтарар кlули гъушну.

Гьаму макьалайиъ дурарикан жикъиди мялумат тувдихьа.

Москва

Ихь уьлкейин столица Москва шагьриъ табасаранлуйин кьюб аьхю мажлис-ифтарар гъахьну. Сабпиб 5-мартди, кьюбпибсана 25-пи мартди.

Му кьюби серенжемаризра гизаф инсанар уч гъахьну.

Уч духьнайидарин улихь улхури имамари-аьлимари, жямяаьтлугъдин гъуллугъчйири мицдар мажлисарикан ихь халкьдин сабвализ айи мянфяаьтнакан ктибтну. Думутlанна гъайри, ихь табасаранлуйир Москва шагьриъ уч духьну саб столихъ ушв гьибтувалра аьхю баркаллу ляхин ву.

Магьа Москва шагьриъ гьамцдар мажлисар кlули гъахури гизаф йисар ву, ва йислан-йисаз мушван иштиракчйирра гизаф шула.

Гъит Аллагьу Тааьлайи мицдар ужувлан ляхнар тешкил апlру агьлар хъанара артухъ апlри.

Санкт-Петербург

Рамазандин ваз ккебгъну Санкт-Петербургдиъ сабпи ифтар тешкил гъапlдар табасаранлуйир гъахьну. Думу ифтар сабпи мартди, Рамазандин вазлин сабпи йигъан, «Амарант» кlуру залиъ кIули гъубшну. Улихь йисаритlан гьаму йисан мушваъ инсанарра артухъ уч духьнайи.

Уч духьнайидарин улихь улхури Табасаран райондин имам Ансар Рамазановди яркьуди ихь халкьдин арайиъ гъахьи аьлимар-шейхарикан ва дурарин яркьу рякъкан ктибтну.

Му мажлис вари харжар ихь ватанагьли Марат Аслановди кlул’инди чаина гъидисну. Гъит Аллагьу Тааьлайи дугъан садакьа кьабул апlри ва хъанара артухъ апlри.

Му шагьриъра кми-кмиди гьар йисан гьамцдар хайирлу мажлисар кlули гъахури шулу.

Каспийск

16-пи мартди Каспийск шагьрин «Каспий» кlуру залиъ аьхю мажлис-ифтар кlули гъубшну. Думу мажлисдин Табасаран ва Хив районарин имамар ва гьацира жямяаьтлугъдин тешкилатчйир иштирак гъахьну.

Му мажлис гирами Каламдиан аятар урхбиинди ачмиш гъапlну.

Мажлис кlули гъабхурайир РД-йин ГБОУ «РФМЛИ» директорин заместитель Физули Сефербеков вуйи.

Имамари гирами вазликан ктибтури, вяъзйирин арайиъ мавлидар-назмар урхури, му мажлис заан дережайиинди кlули гъубшну.

Душваъ гьацира бицlидариз суалар туври, дюзи жавабар тувдариз пешкешар тувну. Талитарин аьхириъ пешкешар вари бицlидаризра пай гъапIну.

Дерберт

Дербент шагьриъ вари Кьибла Дагъустандин аьхю мажлис-ифтар гъабхьну. Душваъра аьхю кьадар инсанар иштирак гъахьну.

Дупну ккундуки, Дербент шагьриъ гьарйисан гьамцдар мажлисар апlура ва душваз жюрбежюр районариан инсанар уч шула.

Гъит Аллагьу Тааьла вари тешкилатчйирикан рази ишри.

Даг.Огни

Огни шагьрин кlулин майдандиин думу шагьрин глава Замир Шамсутдиновичди духовенствойихъди сатlиди тешкил дапlнайи зурба мажлис гъабхьну. Му мажлиснаъ 5 агъзуртlан артухъ инсанар иштирак гъахьну.

Хив район

21-пи мартди Хив райондин Хив гъулаъ айи «Мердишан» залиъ вари райондин мажлис кlули гъубшну. Душваъ тамам вари гъулариан инсанар иштирак гъахьну.

Мажлиснаъ улхурайидарин арайиъ суалар туври, хъа дюзи жавабар тувдариз багьалу пешкешар тувну.

Дупну ккундуки, гьаму йисан Хив райондин гизаф гъулариъ жямяаьтдин ифтарар гъахьну. Дицдпар мажлисар сатlиди вари гъул-жямяаьтдин аьхю иштираквалиинди кlули гъушну.

Гъит Аллагьу Тааьлайи кьабул апlри.

Табасаран район

Табасаран райондиъра жюрбежюр жямяаьтари чпин гъулариъ ифтарар гъапlну. Думутlанна гъайри гирами ваз ккебгъну садпи йигъланмина Гьепlил гъулаъ рякъюхъ гьарйигъан, 150-200 касдиз плов гьязур дапlну, пай апlури гъахьну.

Гъит Аллагьу Тааьлайи варидарин гъапlу садакьа заан дережайиинди кьабул апlри.