Аьлимариз гьюрмат
Аьлимариз гьюрмат
Ассаламу аьлайкум, гьюрматлу редакция! Йиз суалназ дикъат фикир тувайчва. Узу жвуваз аьгъдруб аьгъю ксарихьан, аьлимарихьан гьерхри яшамиш шули гъахьунза.
Улихь вахтари илим гъурху касдихьна, аьлимдихьна аьхю гьюрмат шуйи. Аьхиримжи вахтари лигуразаки, жигьилариз аьлимар гьичра гьяспикк ккадар, дурариз чпи кlурубтlан рябкъюрадар. Гьамдикан гизаф фикир апlури шулза. Гьамус гьамциб суал: аьхиримжи йисари жигьиларин аьлимарихьна гьюрмат дубгуз себеб шлуб фу дигиш гъабхьну?
Ваалейкум ассалам, гьюрматлу ватанагьли! Рябкъру гьялариан, уву ихь жигьиларикан гизаф фикрариъ ава. Гъит Аллагьу Тааьла увкан рази ишри.
Яв суалнан гьякьнаан жикъиди жаваб туврача. Дигиш гъабхьиб фукlара адар, амма саспидар, илимра дурухди, чиб аьлимар вуча кlури лицура. Ав, уву гъапиганси, ихь халкьди гьарган аьлимариз заан гьюрмат апlури гъахьну.
Имам Аьгьмаддихьан вуйи Пайгъамбарин гьядисдиъ дупна: «Яшлуйириз гьюрмат дарапlрур, бицlидарихьна рягьимлувал адрур, аьлимарин гьякь аьгъдрур ухькан дар».
Аьлимарихьна гьюрмат апlбан гьякьнаан диндиъ гизаф дупна. Пайгъамбарин кьяляхъ асгьябари, хъа табиинари ва гьамци ихь дин заан илим айи ксарихьанмина гъурубкьну. Гъийин йигъанра илим тарабгъурайидар, диндин дарсар киврайидар, ухьуз имамарди гьязур апlру баяриз дарсар туврудар аьлимар ву.
Имам Аьгьмаддин мялим Халяф бин Аль-Ахмариз саб ражари имам Аьгьмад чан гъвалахъ дитуз ккун гъабхьи, амма имам Аьгьмадди гьамци гъапи: «Узу яв улихьтlан дусидарза, ухьуз дупнадаринхъа, увуз илим улупурин багахь хушуъди йихь кlури».
Гьамци аьхю имамарира кмиди тмуну аьлимдихьна гьюрмат апlури гъахьну.
Гъийин йигъан саспи инсанарин метлеб аьлимарихьна вуйи гьюрмат адабгъувал ву. Дурари чпи варитlан аьгъюдарси улупура, аьлимариз фу аьгъя, ясана дурари кlуруб гьякь дар, дурари политика гъабхура, кlура вая гьаци жара гафар арайиз хура. Гьаддиз гьамцдар ляхнарра арайиз гъюра.
Ихь жигьилари му ляхникан фикир апlур ва гележегдиъра аьлимарихьна диндиъ улупнайи саягъ гьюрмат ади гъузур, кlури, умуд киврахьа.
Гъит Аллагьу Тааьлайи аьлимариз, илимлу агьлариз гьюрмат апlуз ухьуз варидариз кюмек туври! Амин!
