Мугьяммад пайгъамбар наан айкlан?
Мугьяммад пайгъамбар наан айкlан?
Суал: Гьаму жилилан Мугьяммад пайгъамбар гъушхъан, думу наан айкlан ва думу айи йишвкан фунуб гьядисдиъ дупнайкlан?
Жаваб: Гьамусааьт вари кечмиш духьнайидар барзах кlуру йишваъ а. Барзах – гьаму дюньяйинна аьхиратдин арайиъ айи муддатнаъ инсанарин рюгьяр шлу йишв ву.
Пайгъамбарра ﷺ гьадму гьялнаъ а, думу чlивидира ву. Пайгъамбрар чпин накьвариъ чlивиди ву кlурайивалихъ хъугъуб, Агьлю сунна валь жамааьйин имандикан шула. Дидин гьякьнаан гирами аятариъ ва Пайгъамбарин ﷺ гьядисариъ дупна. Думу далиларихъди сабси, зиихъ дупнайи гафар гьякьлудар вуйиб гьамдианра аьгъю шула:
1) Аллагьу Тааьлайи гирами Каламдиъ дупна (мяна): «Аллагьу Тааьлайин рякъюъ кечмиш гъахьидариз гъийихдар макlанай. Ваъ, дурар чlивиди ву, амма учвуз рякъюрадар» (сура «Аль-Бакьара», аят 154).
Гьаму аятдиъ дупнаки, шагьидар чпин накьвдиъ чlивиди ву. Эгер шагьидариз гьамциб заанвал тувнаш, хъа дурартlан заанди вуйи пайгъамбрариз думутlан артухъ вуйибра рубкьурадаринхъа?!
2) Анасдихьан Пайгъамбарин ﷺ гафар хура: «Пайгъамбрар чпин накьвариъ чlивиди ву ва дурари душваъ ибадат апlура» («Муснад» Аль-Баззара, гьядис №6391; «Муснад» Абу Яля, гьядис №3425).
3) Аус ибн Аьвсди Пайгъамбарин ﷺ гафар хура: «Учвуз варитlан багьалу вуйиб жвуми йигъ ву. Гьадму йигъан Адам пайгъамбар халкь гъапlну ва гьадму йигъан думу кечмишра гъахьну. Гьадму йигъан Гъиямат йигъ улубкьбан лишан вуди сабпи ражари кIарчлиъ ил ибтди ва гьадму йигъан кьюбпи ражарира ил ибтди. Гьадму йигъан уз’ина салават урхай, дугъриданна, ичв салават узухьна рубкьуру». Асгьябари гьерху: «Жили хъютlюркьнайи увухьна салават фици рубкьуйкlан?» Пайгъамбари ﷺ гъапну: «Дугъриданна, Аллагьу Тааьлайи пайгъамбрарин беденар хътlюкьюб жилиз гьярам дапlна». (Ибн Маджа, гьядис №1636).
Магьа гьаму зиихъ тувнайи гьядисариан ачухъ шулаки, шагьидар ва пайгъамбрар аьхиратдиз гъушганра чlивиди гъузра.
Аллагьу Тааьлайи гьаци заанди дурар дерккнаки, вари махлукьатар, инсанар, жинар - гьамрарин варидарин кlулиъ ади. Гьаци вуйиган, Пайгъамбарин ﷺ гьядисдиъ дупнайиганси, жвуми йигъан ухьу артухъдиси салаватар урхури, Пайгъамбар ﷺ кlваин апlури духьну ккунду.
Гъит Аллагьу Тааьлайи ухьу Чан ккуни лукlарикан апlри ва гъит Гъиямат йигъан ухьу Пайгъамбарихъди ﷺ сатlиди ишри.
