Инсанарин чIуруваларихьан уьрхру 4 дюаь
Ухькан саспидариз, белки, алахьнушул сар шликIа ухьуз зарар шлу ляхнар апIру дюшюшар. Уьмрин тажруба айи ва Аллагьу Тааьлайихъ кIваантIан хъугънайи касдиз ухьухъди шулайиб вари анжагъ Сар Аллагьдихьан ﷻ вуйибдиин инанмиш ву, гьаддиз дицир кас, инсанарихьан вуйи писвалихьан уьрхя, кIури, Аллагьу Тааьлайиз ккарагури, дюъйир апIури шулу.
Гьамциб къайдайиинди мусурман касди чан вари ляхнар Аллагьу Тааьлайиина гъитру ва читинвалиъ анжагъ Дугъкан кюмек ккун апIуру.
Магьа ичв фикриз Аллагьу Тааьлайи гьаънайи пайгъамбрари урхури гъахьи дюъйир туврача.
1. Нугь пайгъамбари урхури гъахьи дюаь
أَنِّي مَغْلُوبٌ فَانتَصِرْ
«Инни магълюбун фантаĉир».
Мяна: «Уз’ин гъалиб гъахьну. Узуз кюмек апIина!» («аль-Кьамар» сурайин 10-пи аят)
2. Ибрагьим пайгъамбари ва дугъахъди хъайидари урхури гъахьи дюаь
رَبَّنَا لَا تَجْعَلْنَا فِتْنَةً لِّلَّذِينَ كَفَرُوا وَاغْفِرْ لَنَا رَبَّنَا إِنَّكَ أَنتَ الْعَزِيزُ الْحَكِيمُ
«Раббана ля таж`аьльна фитната-ль-лилляҙина кафару, вагъфир ляна раббана иннака анта-ль-аьзизу-ль-гьяким».
Мяна: «Я Рабби! Увухъ хътругърудариз учу уткан мапIана. Аьфв апIина ич, я Рабби, дугъриданна, Уву Аьзиз вуйир, Гьяким вуйир вува» («аль-Мумтагьана» сурайин 5-пи аят).
3. Муса пайгъамбари урхури гъахьи дюаь
رَبِّ نَجِّنِي مِنَ الْقَوْمِ الظَّالِمِينَ
«Рабби нажжини мина-ль-ḱьавми-ззалимин»
Мяна: «Я Рабби! Зулумкар инсанарихьан узу урхя!» («аль-Кьасас» сурайин 21-пи аят).
4. Мугьяммад Пайгъамбари урхури гъахьи дюаь
بِسْمِ اللهِ الَّذِي لاَ يَضُرُّ مَعَ اسْمِهِ شَيْءٌ فِي الأَرْضِ وَلاَ فِي السَّمَاءِ، وَهُوَ السَّمِيعُ العَلِيم
«Бисмиллягьи-л-ляҙи ля язурру мааьсмигьи шайун фи-ль-арзи ва ля фи-с-самаи ва гьува-с-сами‘у-ль-аьлим».
Мяна: «Аллагьдин ччвурнахъан, му ччвурнахъди я жилариин, я завариъ сабдихьанра зарар тувуз даршул, дугъриданна, Думу Ебхьрур ва Аьгъюр ву!»
Пайгъамбарин ﷺ гьядисдиз асас духьну кIураки, му дюаь гвачIинган гъурхур хябяхъдизкьан вари писваларихьан уьрхиди, хъа хябяхъган гъурхган - гвачIиндизкьан» (Ибни Мажагь).
КваантIан Аллагьу Тааьлайихьна илтIикIу кас жаваб дарди гьичра гъузидар, гьаддиз магьа гьамцдар себебар-дюъйир урхури, ухьу ужувлахъна гъюз чара апIури ккунду.
Гъит Аллагьу Тааьлайи ухьу вари писваларихьан уьрхри, ухьуз гьякь рякъ улупри!
