Эй сабвал, сабвал! Набшдикlан уву?
Рамазандин ваз улубкьну! Гьар ражари Рамазандин ваз улубкьруган, арайиъ адру «аьлимарра» ачмиш шулу. Гьарсар блогериканра «аьлим» шула. Миди фу кIура?
Гьаму ляхни диндин аьгъювалар адрудариз чни заанди рякъюрайивал улупура. Рамазандин гирами ваз улубкьруган, Дагъустандин аьлимари цlийи ваз рябкъюруш лигури, комиссия тешкил дапIну, ахтармишар гъахуру. Мурари зегьмет зигурайи вахтна, саб гьярфкьан аьгъю дарапlу ксар, ваз цIийи фила шулуш улхури, телефондиъ дусну шулу.
Я Рабб, мурариз Аллагьдихьан гучlурдайкlан? Мурариз чпи закурин йигъан гьарсаб гафнахъан, ляхнихъан жаваб тувну ккуниб аьгъдайкlан? Йиз фикриан аьгъя, лап ужуйи. Гьаз гъапиш имамари, аьлимари кми-кмиди гьарсаб жвуми йигъан дидкан мялумат тувра. Гьаци вушра дурариз чпи апlурайи ляхин заанди рябкъюра.
Гьамус лигайчва, варидагъустандиъ сад йигъ шула, хъа сакьюдар инсанар - дурарихьан жаради. Му ужи вуйинхъа? Гьаму инсанар ихь халкьдин арайиъ сабвал дубхьну даккнидар ву. Эгер инсан аьлимари кlурубдихъди гъягъюрадарш, думу касдиз футна апlуз ккунду. Дици дарш, гъит чан вари ляхнар гъитну, илим аьгъю апlуз хъюгъри. Гьаму аьлимари фици йисариинди саб ляхинра адарди тамамди илим аьгъю апlури гъахьнуш, гъит гьадму касдира гьаци апlри, хъасин дугъан фикрихъдира гъягъидихьа. Саб жюрейин илимра адарди, анжагъ соцсетариъ кlубанди ву кlури, дицир касдихъди гъягъюз даршул.
Гьяйифки, бязидарин аьхю аьлимарихьна гьюрмат цlибтlан адар, саспидаринсана заткьан адар. Думу ужи дар. Улихь вахтарианмина илимлу касдихьна гьюрмат ади шуйи, хъа гьамусдин саспи жигьилари му ляхнар батlил дапlна. Мици гъубзиш, ихь арайиъ гьюрмат лап кьит шул.
Дурар аьхю яшнан инсанар цlиб хьайиз ккилигурахьиди. Дурариз хъасин вари чпин хлиз гъадабгъуз ккундашул. Дициб йигъ даршул кlури, умуд киврахьа. Гьаз гъапиш дурарин хилиъ диндин ляхин абхъиш, вари батlил шулу. Диндикан вуйиб фукlара гъудрубзур.
Эй жигьилар! Учву гьаз мукьадар чlур духьначва? Варидарикан кlурадарзагьа. Соцсетариъ дусну имбудариз чlурувалихъна теклиф апlурайидарикан улхураза.
Ислам ислягь дин ву. Гъачай ухьура ислягьвалиъ гъузхьа. Гирами Рамазандин ваз шадвалин, ислягьвалин, гунгьарин аьфв апlуз себеб шлу, шейтlан ва иблис пашман шлу ваз ву. Му вазли гиранвалариъ ваъ, хъа мясляаьтнаъ духьну ккунду.
Пайгъамбар ﷺ ва дугъан асгьябар – магьа ухьуз нумуна. Гъачай му ксари Рамазандин ваз фици адапlури гъахьнуш, лигухьа.
Гьюрматлу ватанагьлийир! Сабур апlинай, сабурнахъ хъубкьруб гьич фукlара адар. Сад йигъан ухьу му жилилан гъягъруб кlваълан магьапlанай. Думутlанна гъайри, ухьу гьарсаб ляхнихъан Аллагьу Таьлайин улихь жаваб тувну ккунивалра магьарханай.
Инсандиз аьхиратдиъ читинди шул, жарарихъан дарди жвуван гунгьарихъанкьан жаваб тувуз шулдар. Му ваз шлукьан гизаф Гирами Калам урхури, Пайгъамбариина салаватар хури, зикрар урхури адапlурхьа.
Ккун апlураза Аллагьу Тааьлайикан му гирами вазли ухьуз, улхьан йисаритlан хъанара артухъ ибадат апlури, ужувлар апlури кlулиз адабгъуз тавфикьвал тувуб! Амин!
Гъит улубкьурайи машкварра ухьу жандин сагъвал ади, кlван шадвал ади къаршуламиш апlру агьларикан ишри.
