Гъудгнин жикlбан фарзар
Гъудгнин жикlбан фарзар
Гъудгнин жикlруган тамам дапlну ккуни 6 рукун а:
Сабпиб – ният.
Фарз ният маш жибкlуз хъюгърайи вахтна апlуру. Ният гьамци апlуру: «Узу ният гъапlза фарз гъудгнин жикlуз». Фу ляхниз ният апlурашра, думу кlваантlан апlруб ву, хъа мелз кlваз кюмекчи ву, яни кlваъ айиб мелзниинди текрар апlуру. Эгер маш жибкlуз хъюгъру вахтна дарди, мисалназ хилар жикlруган, ният гъапlиш, думу ният кайиб шуладар. Хъа хиларин гагьар жикlруган гъапlу ният суннатарикан шула.
Кьюбпиб – маш жибкlуб.
Машнан сяргьятар гьисаб шула унтlнан заълан ккебгъру йишвхъан шархьлин исиккна ва саб ибхъан тмуну ибахъна. Гьаму вари йишв дижибкlну ккуниб ву. Эгер гьаму сяргьятариз дахил шулайи йишвкан фукlа дижрибкlди гъибтиш, гъудгнин жикlувал шуладар.
Шубубпиб – хъуршларра кади, кьюбиб хилар жикlуб.
Эгер хил хъадабтlнаш, дидин имбу пай жибкlуру, эгер хъуршлихъна хъадабтlнаш, имбуб жибкlуру. Эгер дидхъан зиинара хъадабтlнаш, думу жибкlуб фарз шуладар, хъа суннат ву. Эгер хиларик шид кубкlуз гъидрибтру фукlа каш, сифте думу марцц дапlну, хъасин тамамди дижибкlну ккунду. Эгер тlубарин шибарикк кьар ккади вуш, думура марцц дапlну ккунду. Яни лиъдик шид кубкlуз манигъ’вал апlрубдихьан варибдихьан марцц дапlну ккунду.
Юкьубпиб – кlуллан кьяши хилар алдатуб (масгь апlуб).
Дидин варитlан цlиб кьяши хил кlуллан алдатуб ву, саб чIаркьан кьяши шлуганси. Думу кушар ярхидар вуди, дурарин кlакlарин масгь гъапlну кlури, чяаьн шуладар. Му ляхниз дикъатнаан фикир тувай. Саспидари унтlан заълан кадатну гъитри шулу, думу масгьу вуди гьисаб шулдар. Масгь хьпан бадали, кlулин сяргьятариъ учlврайи кушар кьяши апlуру.
Хьубпиб – зизкьарра кади, кьюбиб ликар жикlуб.
Ликар жикlруган, гизафдари швякьяр, шибарин исиккна, зизкьарихьна тамамди шид дурубкьну ккунивализ фикир тувурдар. Дици дубхьну ккундар. Вахт-вахтарик шибар алдатlури, ликар марцциди дюбхну ккунду. Гьаци гъабхьиш, гъудгнин жикlувалра камил шул.
Йирхьубпиб – гьамрар вари хъайи-хъайиси тамам апlуб.
Ухьу зиихъ ктухдар вари хъайи-хъайиси тамам дапlну ккунду: сабан маш, хъасин хъуршларихъансина хилар, хъасин кlулин масгь, хъа ликар. Эгер гьаму къайда чlур гъабхьиш, гьадму йишвхъанмина хъанара хъайи-хъайиси тамам апlуру.
Гъудгнин жикlувализ ухьу дикъат фикир тувну ккунду, гьаз гъапиш, эгер му ляхин гъалатlар кади, тамам дарди гъабхьнуш, гъудганра кам шулдар. Гьаци вуйиган, му ляхнар гьялак дарди, Аллагь ﷻ кlваинди апlрудар ву, ва гьаци апlури гъахьиш, ужира шул.
