Дада, узузра Женнет ккундузуз!
Дада вуди 6 йистIан артухъ вуйиз, амма гьамусра веледдихъди фици гаф-чIал дапIну ккундуш, аьгъю апIури имиза. Хъа гъи узуз тербия тувбан сакьюдар сирарикан ктибтуз ккундузуз.
Шлиз-вуш мурар ужуйи рякъюр, хъа шлиз-вуш чIуруди, амма дурар абйир-бабариз герек шлудар ву. Саспидарин жилир хулаъ хялижвситIан шулдар, ва веледариз тербия тувуб дадайин гъюнариин алабхъуру. Гьаци вуйиган, узуз айи бицIи дадавалин тажрубайикан ктибтуз гьялак хьидиза. Йиз бай уткан велед вуйиз, ма ша Аллагь (гьелбетда, гьарсар дадайи гьамци фикир апIуру)! Дугъахъди сюгьбат гъабхруган, гизаф шадвал шулзуз, узу дугъаз фу-вуш улупруганси, дугъу узузра фу-вуш улупура кIури, гизаф фикир апIури шулза. Узу веледариз тербия тувбакан вуйи жюрбежюр китабар урхури, бицIидарихъди гаф-чIал апIбаъ иллагьки гьякьвал дубхьну ккунивалин гъаври гъахьунза! «Ичв веледариз кучIлар мапIанай», - гьамци дупна ухьуз ихь Пайгъамбари ﷺ! Веледдиз зарар хьибди кIури, учвуз гьякь пуз ккундаш, гьаддин гьацIкьан, ясана думу гафар жараси пуз чалишмиш йихьай. Йиз веледдин гьелелиг 6 йис тамам дубхьнадариз, амма, эгер узу кучIал апIури гъахьиш, дугъаз дишлади аьгъю шулу, ва хъасин думу гафар узуз къаршуди ишлетмиш апIуру.
Гьаци вуйиган, узу йиз улихь гьамциб месэла дивназа: веледдиз кучIал дарапIуб, дугъаз анжагъ гьякь пуб. Хъа эгер ухьу жюрбежюр мультфильмйирикан, компьютериан вуйи тамшйирикан ва гь.ж. кIуруш, му дюшюш гьял апIуз хъана рягьятди ву. Ма ша Аллагь, му ляхнарихьан йиз велед ярхлади ву. Улихьнаси дугъу гизаф жюрбежюр Лунтикариз, Машайикан ва швеъракан вуйи мультикариз лигури шуйи. Узу дурар вари компьютериан ктIушвунза, диндихъди аьлакьалудар ктарди. Дурариз саб сяаьтди лигуз гъитну, хъасин шиклар кауз гъитри, диндихъди аьлакьалу вуйи флеш-тамшйир апIуз гъитуйза. Вахт-вахтарик «Почемучки» кIуру бицIидариз вуйи диндин передача кабхьуйза. Узуз йиз велед спортдин дарсариз гьауз ккундузуз, иллагьки сирнав апIру йишваз, гимнастикайиз, ва Аллагьдикан ﷻ йиз веледдиз сагъ’вал ккун апIураза. Гьюрматлу абйирбабар! Аллагьу Тааьлайи абйирбабари чпин веледарихъан гъапIу дюаь кьабул апIрубдикан кIваинди гъибтай, дурариз чIуруб ккун апIувалихьан ярхла йихьай, гьеле дурар учвухъ гъпехъурдаршра, ичв веледариз гьаму дюн’яйиъра, Ахиратдиъра уж’вал хьуб ккун апIинай…
Улихьнаси саб аьламатнан ляхин улубкьунзиин. Дидин, гьарган чипсар, сухарикар гъадагъ, кIуру веледарин абйир-бабар ужуйи гъаври шул. Учу маршруткайиъди гъягъюрайган, душваъ чипсар дадаргънайи ва ичIи пачкара багахь дипнайи. Йиз веледдиз му «шаду» хабар узуз улупуз ккун гъабхьи. Узу дугъ’ина сес за дарапIди, ясана фукIа дарпиди, хулаз гъяйиз сабур апIуб ккун гъапIунза. Хулаз гъафиган, узу Google сайтдиъ «чипсарин балайикк ккахъур» кIури дибикIну, душваъ удучIву шиклар бализ улупунза. Душваъ удучIву ацIу духьнайи веледар гъяркъган, йиз балин маш фици дигиш гъабхьнуш, рябкъюз ккунийчвуз! Хъасин дурарикан фициб зарар аш ва, гьаму ляхин себеб вуди, узу чипсар, сухарикар, кола гъададабгърубдикан ктибтунза. ЦIиб вахтналан узу, йиз фикир кIулиз удубчIвнуш, имтигьян гъадабгъунза. Магазиндиз гъушган, балхьан чипсар гъадагъузавуз, кIури, гьерхза. Магьа фициб жаваб тувнуш узуз йиз бали, хъял кадиси: «Дада, увуз узу кечмиш духьну ккундунуз?!» Узу мициб къайда кIулиз удубчIврубдин гъаври гъахьунза, ва саб ражари дугъаз женнетдин ва жегьеннемдин шиклар улупза (хъанара Google сайтдиан), ктибтунза фици чIуруди вуш жегьеннемдиъ ва фици ужу вуш женнетдиъ. Йимишар, водопадар улупури, вари Исламдихъди ва Аллагьу Тааьлайиз ибадат апIбахъди аьлакьалу апIуйза. Мурар вари анжагъ веледарин дережайиинди апIуйза, амма мурари чпин бегьер туву – йиз бали яваш сесниинди гъапну: «Дада, узузра Женнетдиз гъягъюз ккундузуз!» Саб ражари гъудгнин кьяляхъ дугъу гьамциб дюаь гъапIну: «Я Аллагь! Йиз абйир-бабарин гунгьарин аьфв апIин ва дурариз гьяждиз гъягъюз кюмек апIин. Я Аллагь ﷻ учу жегьеннемдихьан ярхла апIин, учу Женнетдиъ шлуганси апIин! Амин!» Аьхириъ Аллагьу Тааьлайикан гьаму дюн’яйиъра, Ахиратдиъра ухь’ин ва ихь веледариин рази хьуб ккун апIураза. Гъит ихь веледари ухьуз анжагъ шадвалар туври! Амин!
САИДА ИБРАГЬИМОВА
