Хюрикк гъулан агьали
Табасаран райондиъ айи аьхю гъуларикан саб Хюрикк гъул ву. Аьхю гъулариъ жюрбежюр кеспнан инсанарра гизаф шулу. Саспи инсанари халкьдиз гафниинди мянфяат тувру, хъа тмундари - ляхниинди. Гьарсар чаан удукьруганси халкьдиз мянфяаьт тувуз чалишмиш шулу.
Хюрикк гъулаъ гизаф жюре инсанар а: гьякимар, политикайин ва жямяаьтлугъдин тешкилатчйир, культурайин гъуллугъчйир ва нежбрар. Гьамрарикан сар вуди гьисаб шула гьаму макьалайин игит Агъабег Рамазанович Рамазанов.
Рамазанов Агъабег Рамазанович 1950-пи йисан Табасаран райондин Хюрикк гъулаъ мешебеги Рамазнан хизандиъ бабкан гъахьну. Дугъу 1968-пи йисан сифте Дагъ. Огъни поселокдиъ технический мектеб ва гьадму йисан Дербентдиъ автошколара ккудубкlну. 1969-пи йисан А. Рамазанов СССР-ин Яракьлу кьувватариъ чан ватандаш’валин буржи тамам апlуз гъушну.
Армияйин жергйириан 1971-пи йисан гъулаз гъафи Агъабег Хюрикк гъулаъ ерлешмиш дубхьнайи «Кужникский» совхоздин фермайиъ Т-16 маркайин машиндихъ лихури гъахьну. Кьюд йисан му совхоздиъ лихбалан кьяляхъ, думу киносетдиъ, хъасин Табасаран райондин гьяйванатар сагъ апlру тешкилатдиъ водителди гъилихну. Сад-швнуд йисан райондиъ машинарихъ лихбалан кьяляхъ, дугъу Казахстандин жюрбежюр колхозариъ, совхозариъ, ПМК-йириъ тикикишчивалин ляхнар гъахури гъахьну.
Хъасин Акьуша райондин Шукты гъулаъ тикилишчивалин ляхнар апlурайиган А. Рамазанов Шукты гъулан агьали, машгьур экономист ва агроном, РФ-йин Халкьдин Собраниейин депутат Мягьямад Абакарович Чартаевдихъди таниш шулу. Чартаевдин регьберваликкди Агъабеган бригадйири Шукты гъулаъ цlийи хулар тикмиш апlури гъахьну.
Думутlанна гъайри, Агъабег халуйи жвуван халкьдизра, хусуси вуди жвуван багъри Хюрикк гъулазра гизаф ужувлар гъапlну. Гьадрарикан саб шулаки, думу гъулаъ мист ачмиш апlбаз себеб гъахьну . СССР-ин вахтна Хюрикк гъулаъ айи мистаъ музей ади гъабхьну. Музей адабгъну мист ачмиш апlру ксарикан сар вуди Агъабег халу гъахьну. Гьадмуган Агъабег халу ва имбу ксарин кюмекниинди ачмиш гъапlу мист магьа гьамусра либхури ими. Мист ачмиш дапlну, хъа чардагъ дигиш апlру вахтнара Агъабег халуйин кюмекниинди Мамедкалайиан герек вуйи материал дубхну, думу дигиш гъапlну. Чардагъ жямяаьтдин кюмекниинди ккудубкlну, хъа циркулярный станкйирихъ думуган гъилихдар гъуланданр Мажид халу ва Мустафа халу вуди гъахьну.
Вахтар гъягъюри, мистаз гъюру инсанар артухъ гъахьиган, Хюрикк гъулан мист’ин кьюбпи мертебера алапlну. Гьамци Агъабег халуйи мистазра, имбу ляхнаризра гизаф кюмекар гъапlну. Гъит Аллагьу Тааьла рази ишри чакан.
Гьамци тазади аргъаж шулайи наслариз дугъриданна гизаф зегьмет зигури гъахьи ихь яшлуйирикан ктибтури шулухьа.
Агъабег халуйизра кlваантlан чухсагъул кlурахьа. Гъит Аллагьу Таьлайи чаз жандин сагъвал, кlван шадвал туври, гележег акуб ибшри!
