Гъудгник кучlвруган, фикир тув…
Гъудгник кучlвруган, фикир тув…
Гъудган гьарсар мусурман касдиин али фарз ву. Гьаддиз ухьуз фарз гъудгнихъди аьлакьалу вари месэлйир якьинди аьгъяди ккунду. Гьадрарикан саб, жямяаьт гъудгниз кьан гъапlу кас фици гъудгник кучlвну ккундуш, гьадму ву.
Суал:
Эгер узу гъудгник кучIвру вахтна имам рукуъдиз душнади гъабхьиш, узу фу дапlну ккунду: гъудгник кучlвбан такбир дурхну дишлади рукуъдиз гъягъюйин, даш гьадму гъудгник кучlвбан такбирихъан рукуъдиз гъягъбан такбирра дурхну ккундин? Эгер гъудгник кучlвбан такбирихъди дишлади рукуъдиз гъушиш гъудган батlил шулин?
Жаваб:
Эгер уву имамдихъди гъудган думу рукуъдиъ айиган хъибтlраш, думуган дугъужвну гъудгник кучlвбан такбир урхурва, хъасин рукуъдиз гъягъругандин такбирра урхуб ужу ву. Кьюбпи такбир дурухди рукуъдиз гъушишра гъудган кам шула, гьаз гъапиш му дюшюшдиъ кьюбпи такбир урхуб сунна ву, фарз дар.
Эгер гъудгник кучlврайи такбир уву ис духьну гъурхиш, ясана гьацl дугъужвну имиди, гьацlсан ис шулайиган гъапиш, думуган гъудган батlил шулу, гьаз гъапиш гъудгник кучlвруган урхру такбир гьякьлуб хьпан бадали, вари такбир урхру вахтна уву дугъужвну ади ккунду.
Къайд:
Дупну ккундуки, гъудгник кучlвругандин такбир урхруган, инсандин анжагъ гъудгник кучlвру такбириз ният ади ккунду, хъа эгер дидихъди сабси рукуъдиз гъягъру такбиризра ният ади гъабхьиш, думуган, аьхю пай аьлимарин гафариинди, гъудган батlил шула.
