Асгьябари фана дюн`яйикан гъапи келимйир
Асгьябари фана дюн`яйикан гъапи келимйир
Хайлин динагьли аьлимарина асгьябари хъайи-хъайибси ухьуз фана дюн`яйин къанажагъдикан ва му дукIну гъягъру дюн`яйин хатIасузваларикан дупнахьуз. Магьа гьацдар насигьятарикан ва ихтиятваларикан варидариз хайир кайи келимйир.
- Жунайд аль-Багъдади имамди гъапну: «Фуж гвачIиндиъ, чан ккагънайи уьмрин гьялнакан кIури, учIвиш, думу чан Агъайиина аьрз апIурайирси рякъюру. Хъа шли, дуланажагъдин ляхнарикан ва алахьнайикьан камиваларикан пашмандиси гъапиш, гьадмура Аллагьу Тааьлайикан хъял дапIнайирси рякъюру. Хъа фуж, девлет айи касдихь асккан гъахьиш, дугъан диндин кьюбдикан шубубпи пай кам хьибди».
- Динагьли аьлимарикан сари гъапну: «Аллагьу Тааьлайиз сар кас Чаз ккунир (вали) вуди ктагъуз ккун гъабшиган, дугъаз гьаму дюн`я даккун апIуру».
- Сар рюгьлу насигьятчийира гъапнийи: «Гьей мюрид, гьаму дукIну гъягъру дюн`яйин уж`валарикан увуз гьадмукьандар гъит, фукьандар уву жарадарихьан тIалабниинди гъадагъураш, ва гьаму дюн`я дипну гъягъюрайирра, михъичIирхан».
- Шейхарикан сари улупну: «Кьюб ужуб гъиллигъ а, ва дурар кайирикан, улихьди гъягъру имам гъахьиган, дугъан кьяляхъди инсанар гъягъюру. Сабпиб – фана дюн`я даккун апIуб ва думу гьисс дарапIуб; кьюбпиб – сабриинди вари бедбахтвалар ва диндин чвйирин хъял гъадагъуб.
- Аш-Шазали имамди гъапну: «Аллагьу Тааьлайи Чан лукI, дугъу фана дюн`я даккун гъапIигантIан ва кьюбиб дюнйириъра уж`валарихъ хъергнайидарихъан хътаркигантIан, ккун апIудар».
- Гьацира думу имамди гъапнийи: «Шли дукIну гъягъру фана дюн`я ккун гъапIиш, гьадму Аллагьу Тааьлайиз даккнир ву. Гьаддиз, мюридди гьаму дюн`яйин вари уж`валарихъан чан юкIв марцц хъадабтIну ккунду».
Аьгъю йибхьай, мусурмнар, гьаму дюн`я гъябгъюрайи, сиринси, лукIранна Агъайин арайиъ айи пердера ву. Инсандин кIваъ дукIну гъягъру фана дюн`яйихьна бушуругдин саб ударсибкьан ккунивал гъубзиш, дугъкан Аллагьу Тааьлайин гьякь лукI шулдар. Мидихъди сабси, гьаму фана дюн`яйихъан хътадаркиш, Аллагьу Тааьлайи думу кьабулра апIудар.
Шамиль Зурпукьанов
