ЧIуру фикрарихъан гунагь айин?
ЧIуру фикрарихъан гунагь айин?
Суал: Саспи вахтари саб дупну лап чlуру фикрар кlулиз гъюри шуйиз, ва гьапlрушра аьгъдарди гъузуйза. Мициб аьгьвалатнакан гизаф фикрар апlури шулза. Гьаз гъапиш узу Ислам диндин рякъ дибиснайир вуза, гъудгнар апlураза, гьярамдихьан ярхла шулаза ва Рамазандин вазли ушварра гъидисунза. Хъа му фикрари вари ужуб гьял чlур апlурайиз. Йипайчва, му фикрарихъан гунагь айин?
Жаваб: Ухьу жвуву гъапlу ляхнарихъантlан жавабдар шуладархьа. Ухьузра аьгъяди саб ляхин гъапlган, дидин жаваб тувну ккунду. Хъа фикрар ухьлан асиллу дар. Дурар завариъ айи дифарик мисал ву - ухьлан асиллу дарди гъюри гъягъюру. Гьаддиз думу фикрарихъан ухьу жавабдар шуладархьа. Ужудар дару фикрар шейтlни гъабхурайи ляхнин натижа ву, дидиз васвас кlуру.
Дидин гьякьнаан имам Аьгьмаддихьан ва Абу Давуддихьан вуйи гьядисдиъ дупна:
جَاءَ رَجُلٌ إِلَى النَّبِيِّ صَلَّى اللهُ عَلَيْهِ وَسَلَّمَ، فَقَالَ: يَا رَسُولَ اللَّهِ، إِنَّ أَحَدَنَا يَجِدُ فِي نَفْسِهِ، يُعَرِّضُ بِالشَّيْءِ، لَأَنْ يَكُونَ حُمَمَةً أَحَبُّ إِلَيْهِ مِنْ أَنْ يَتَكَلَّمَ بِهِ، فَقَالَ: «اللَّهُ أَكْبَرُ، اللَّهُ أَكْبَرُ، اللَّهُ أَكْبَرُ، الْحَمْدُ لِلَّهِ الَّذِي رَدَّ كَيْدَهُ إِلَى الْوَسْوَسَةِ»
Ибну Аьббасдихьанмина дуфнаки, Пайгъамбарихьна ﷺ сар кас дуфну гъапну: «Саспи вахтна гьацдар фикрар шуйизки, узуз дурар ачухъ апIубтlан рюкъдиз илтlикlуб ужу ву». Му гафариз Пайгъамбари ﷺ шубуб ражари такбир гъурхну: «Аллагьу акбар! Аллагьу акбар! Аллагьу акбар!» Хъасин давам гъапlну: «Гьямд ибшри Аллагьу Тааьлайиз, шейтlнин чlурувалар васвасназ илтlикlбаз». Яни шейтlнихьан фукlа апlуз шуладар ва дидиз гъубзнайиб анжагъ васвас ипуб ву.
Имам Муслимдихьан вуйи жара гьядисдиъ дупнаки, асгьябари Пайгъамбариз ﷺ гъапну: Саспи вахтари кlваъ гьацисдар дигиш’валар шулуки, мелзниинди пуз шулдар. Яни ужудар дару фикрар шлуваликан гъапну. Пайгъамбари ﷺ гъапну: «Думу марцциди Аллагьу Тааьлайихъ хъугъувал ву».
Гьаму гьядисдиан мялум шулаки, мицдар фикрарин кIул инсан чав дар, хъа шейтlан ву, ва мицдар фикрарра шейтlни кlваантlан Аллагьу Тааьлайихъ хъугъу касдин кlваътlан ирчрадар. Гьаддиз Пайгъамбари ﷺ, думу марцциди Аллагьу Тааьлайихъ хъугъувалин лишан ву, гъапну. Гьаддиз думу ляхникан гизаф фикрар дапlну ккундар, ва жвувлан асиллу дарди гъафи дицдар фикрарихъан гунагьра шулдар.
Аллагьу Тааьлайиз ужуйи аьгъя.
