Эй йиз жигьил вахт…
Эй йиз жигьил вахт…
Гьаму жилиин яшамиш шули 70 йис вуйиз. Ислам диндиз варитlан читин вахтарикьан Рамазандин вазли ушв дибрисди гъибтундарза. Жюрбежюр ляхнариъра, гъуллугъарихьра гъахьунза, хъа Рамазандин ваз гьарган заанди дебккру инсанарикан вуза.
Магьа гьаму йисан, гьяйифки, жандин сагъвалихъ мягьрум духьну, йиз уьмриъ сабпи ражари вуди му ваз ушвар дидирисди гъубшнийиз. Пагь, вукьан гъагъи ляхин даринхъа?! Варидари ушв дибисну, хябяхъган сатlиди ушв гьибтру вахтна, саспиган уларилан нимгъарра кмиди гъягъюйи. Эй сагъвал, сагъвал!
Жигьил вахт зяяди маккадапlанай, сагъвализ фикир тутрувди мугъузанай. Ихь аьлимари му гафар кlуруган, мициб фикир шулдайи, хъа гьаму увуз ушв бисуз ккунди, амма яв жанди дициб мумкинвал тутрувруган, кlулиз жюрбежюр фикрар гъюру.
Гьаддиз ихь ватанагьлийирикан ккун апlураза, шли гъудгнар апlурадарш, ушвар дисурадарш, вахтниинди туба апlинай, Аллагьу Тааьлайихьна хъадакай. Хъасин ичв гьациб аьшкь гъабхьиган, сарун кьанра хьуз мумкин ву.
Му уьмур аьламатнануб ву. Магьа 70 йисан яшамиш духьназа, узуз фукьан имиш сар Аллагьдиз аьгъя, амма имбуб лап цlибтlан даршул, хъа гьамус му уьмрикан фикир апlруган, гъаври шулваки, гизаф ляхнар сарун дигиш апlуз шлудар дар. Яв фукьан улар хъашра, сарун даршлу ляхнарра а. Жигьил вахтна мицдар фикрар шулдайи, думуган закурин йигъаз лигуйи, вахт имида кlури, фикир шуйи, хъа гьамус гъаври шулуки, вахт имдар, закурин йигъра увуз фициб шулуш аьгъдар ва йигълан-йигъаз жандин сагъвалра кам шула.
Жигьилариз ва жандин сагъвал айидариз йиз насигьят: гъи апlуз шлу ужувлан ляхнар закуриз мигъитанай. Эгер Рамазандин вазли учву ушвар гъидисундаш, гъюру Рамазандин ваз улубкьайиз дурар вари шлукьан ухди кьаза апlинай, гьаз гъапиш саб дупну ухьу сагъвалихъ мягьрум хьуз мумкин ву. Жандин сагъвалихъ хъубкьруб фукlара адар, сагъ`вал имиди жвуван уьмрин имбу кьатI хайирлу, саваб айи, ужудар ляхнариз ишлетмиш апlинай.
