Фикир тувай, абйир-бабар!
Ассаламу аьлайкум, аьзиз ватанагьлийир! Гьаму улихьнаси Мягьячгъала шагьрин сабуну кючейиъ чпин ляхнин вазифйир гъахурайи ДПС-дин патрулиин экстемистар алархьну ва йивну гъийихдарра гъахьну.
Магьа нубатнан ражари ухьу вари му пис ляхнин шагьидар гъахьунхьа. Гьамциб чlуру ляхнар апlрударин фикир-фагьум фунуб терефназди либхурайкlан кlури, гизафдарин суалра шулу. Дурарикан саспидарин абйир-бабар ужудар аькьюллу, фикирлу, абурлу касар ву, хъа дурарин веледар мицисдар гьаз гъахьнийкlан кlури, суал арайиз гъюру.
Инсандиз гъанихвалин ва инсафсузвалин кьастар айидарихьна илтlикlури пуз ккундузуз: учву абдал гъахьну кlури, тмуну касар фтин тахсир ву? Гьадму учву йивну гъийихдариз хизанар а, дурарихъ веледар, абйир-бабар хъа, дурарин гьялнакан гьаз фикир апlурдарчва? Эгер учвуз му жилиин яшамиш хьуз ккундарш, имбударин фу тахсир а, дурар сикинди гъитай. Инсан йивну йикlувал аьхю гунгьарикан саб ву, ва Аллагьу Тааьлайин улихь учвхьан гьичра дидин жаваб тувуз даршул. Эгер учвуз шликlа, думу ляхин гъапlган му жилилан шагьидарди гъягъюручву кlураш, думу аьхю кучlал ву, думу диндиъ айи ляхнарикан дар. Дици апlру ксариз диндикан хабаркьан адар. Диндикан аьгъю ксдиз шариаьтдиъ дициб къайда адруваликан якьинди аьгъя. Хъа саспи фанатизми келле ккитIибкIнайи жигьилари, гьяйифки, шлин вушра гафарихъ хъебехъну, магьа гьамци чlуру ляхнар арайиз хура.
Гьаци вуйиган, гьюрматлу абйир-бабар, ичв веледари шлихъди дуствал апlураш, дурар шлихъ хъпехъураш, фикир тувай. Гъийин жигьилар, Аллагьу Тааьлайи туврайи ниъматар артухъ апIбахъ, чпи чlур шулайиганси ву. Ислам дин хъапlуз вари рякъяр тlаънашра, дурар гьич сикин шуладар.
Вари шагьрар-гъулариъ цlийи мистар дивра, ибадат апlуз вари рякъяр ачухъди ву, хъа фу гьубкlрадар? Диндин аьгъювалар гъадагърудар лапра цlибтlан дар, варидариз хулаъ имиди, шлихъ вушра хъпехъури, аьлимар хьуз ккунди а. Дурари, аьлимаризтlан чпиз артухъ аьгъячуз кlури, гафарра апlури шулу. Магьа гъийин йигъан ухьуз айи аьгьвалат, алахьурайи читинваларра гьамдиан ву.
КIваъ чlуру фикрар айи, пис ляхнариз кьастар айи жигьиларихьан шлубкьан ярхла духьну ккунду, дицдар жигьиларихьан жвуван веледарра, багьахьлуйирра, жвувахъ хъпехърударра ярхла дапIну ккунду.
Улихь вахтарихъанмина ихь халкьдин арайиъ аьхюрихьна гьюрмат айи, бицlирихьна рягьимлувал айи къайдйир дурари чlур апlура.
Дици дубхьну ккундар! Ихь Ислам диндиъ, инсандиз зарар тувру вари ляхнарихьан ярхла йихьай, кlура. Гьамус ухьу Ислам диндиъ айиб дапlну ккундин, дарш саб жюрейинра аьгъювалар адру жигьиларихъ хъпехъурин?! «Жигьилар» кlуруган, варидарикан кlурадархьа, хъа экстремизм, вахабизм рякъ дибисну, имбударра чlур апlуз чалишмиш шлударикан улхурахьа. Дицдарихьан лап ярхла духьну ккунду, дарш закурин йигъан дурари ихь веледарра гьаци чlур апlур.
Гъит Аллагьу Тааьлайи ухьуз гьякь рякъ дибисну, чlурубдихьан ярхла хьуз амур апlри.
