Гирами Кьур’ан урхбан талит

Гирами Кьур’ан урхбан талит

Гирами Кьур’ан урхувал Аллагьу Тааьла рази шлу ляхнарикан ву. Пайгъамбарин гьядисдиъ дупна: «Учвкан варитlан ужудар Кьур’ан аьгъю гъапlдар ва думу имбудариз улупдар ву».

Гьаму гьядисдиз асас духьну, Табасаран райондин жюрбежюр гъулариъ бицlидариз дарсар туври шулу. Хъа бицlидариз хъанара артухъ аьшкь хьпан бадали, жюрбежюр конкурсар апlури шулу - дурарин хъанара ижмиди юкlв зибгбан бадали.

Магьа улихьнаси Табасаран райондин Хючна гъулаъ айи клубдиъ бицlидарин арайиъ гирами Каламдин 30-пи жуз урхбан талит кlули гъубшну.

Дупну ккундуки, мициб аьхю талит гьеле му райондиъ гъабхьундайи.

Му конкурсдин призовой фонд 100 агъзур манат вуйи.

Конкурс тешкил гъапlдар Табасаран райондин имамарин Совет ва Дяъват отдел вуйи.

Му талитнаъ вари райондиан 50-рихьна бицlидар иштирак гъахьну.

Уч духьнайидарин улихь Табасаран райондин имамарин Советдин председатель Ансар Рамазанов, райондин главайин диндин ляхнарин советник Надир Зульфикаров, Хюрикк гъулан имамдин кюмекчи Рамазан Мягьяммадов удучlвну гъулхну. Мурарикан гьарури гирами Калам аьгъю апlбан заанваликан ва мицдар конкурсарикан ихь гъюрайи наслариз айи мянфяаьтнакан ктибтну.

Дупну ккундуки, му конкурс заан къайдайиинди кlули гъубшну. Иштиракчйири утканди урхбаан - саб, хъа заан аьгъювалар улупбаан - 7 пешкешнан йишвар тяйин апIбанди гъахьну.

Магьа натижйир:

1. Сеферов Асхаб, Ерси (25 000).
2. Гьясанбеков Суфьян, Ляхя (20 000).
3. Абдурягьманов Мугьяммад, Дагъни (15 000).
4. Кьасумов Сефер, Жулжниф (10 000).
5. Аьбдуллаев Ражаб, Гасик, (10 000).
6. Къурбанов Гьяжикъурбан, Хурик (10 000).
7. Сулейманов Рамазан, Кьулиф (5000).

Гирами Калам уткан сесниинди урхбан Ругуж гъул’ан вуйи Ахмедов Руслан (5000) гъалиб гъахьну.

Му ксари, дугъриданна, заан хъуркьувалар улупну. Гележегдиъ хъанара ужудар натижйир шул кlури, умуд кивдихьа.

Му талит тешкил гъапlдари ихь жигьиларин аьшкь хъанара артухъ хьуз мицдар серенжемар вахт-вахтарик тешкил апlурча, кlури, мялумат тувну.

Гъит Аллагьу Тааьлайи Гирами Калам урхуз ухьуз варидариз тавфикь туври ва мицдар конкурсар тешкил гъапlдариканра Аллагь рази ишри.