Мусурнам даруриз Исламдикан хабар тувбан гьякьнаан
Йисар тамам духьнайи кяфир кас мусурмандихьна, чаз Ислам фици кьабул апIуруш улуп кIури илтIикIну, мусурман хьуз ният айиз кIури, гъапиш, эгер багарихь аьлим вая имам хьаш, ари гьялакди гьадгъахьна хъади душну ккунду, гьаз гъапиш, Ислам кьабул апIбан кьяляхъ аьлимди дугъаз улупну ккуни месэлйир а.
Хъа багарихь аьлим хьтарш, ухьу зиихъ гъапиганси, дугъахьди кIваантIан шагьадат урхуз гъитну, жвуваз аьгъюбси дугъаз Исламдин мурхьларикан кидибтну ккунду. Гьаци уву жвуваз аьхю саваб гъадабгъарва, думу саваб гьаму дюн’я ва вари душваъ айибтIан заан ву.
Кьюбиб шагьадатарра аьраб чIалниинди урхуб шартIарикан шуладар. Имам аль-Байжурийи «Тугьфат аль-Мурид» китабди дупнаки, Шагьадат аьраб чIалниинди урхуб фарз дар, гьеле дугъаз аьраб чIал’инди урхуз аьгъяшра, жара чIал’инди вушра пуз хай шулу, ва гьаддиинди кяфир касдикан мусурман шулу. Мусурман хьпан бадали, кьюби шагьадатарра дурхну ккунду, яна шагьадатдин саб пай гъурхну кIури, мусурман хьуз бес шуладар.
Пайгъамбарин ﷺ гьядисдиъ дупна:
مَنْ يُرِدِ اللهُ بِهِ خَيْرًا يُفَقِّهُ في الدِّينِ
«Аллагьу Тааьлайи Чав шлизкIа уж’вал ккун апIруган, Дугъу думу касдиз диндин гъаври ахъувал тувру» (Бухари, Муслим).
Хъа диндин гъаври хьпан бадали, лайикь вуйиси ибадат фици дапIну ккундуш гъаври хьпан бадали, фикьгь илим аьгъю дапIну ккунду.
Аьлимари фикьгь илим 4 пайназ жара дапIна:
- Ибадат (ибадат фу вуш, мяна тувуб).
- Муаьмалат – ариш-вериш ва инсанарин чиб-чпихъди вуйи имбу аьлакьйир.
- Нюкягь ва тIалакь.
- Жинаят – гъапIу аьмаларикан ва аьзабарикан.
