«Ас-салам» газатдин турнир
«Ас-салам» газатдин турнир
Ассаламу аьлейкум, гьюрматлу газат урхурайидар! Ихь газатди магьа, диндин ляхнизси, спортдин гьякьнаанра кюмек тувра.
Гьар йисан «Ас-салам» газатдин футболин турнирар жюрбежюр йишвариъ гъахури шулу. Му йисан ихь чlалниинди вуйи газатдин 20 йис дубхьна ва му юбилей къайд апlури, Табасаран райондиъ аьхю мажлис гъапlну, дидин кьяляхъ бицlи турнирар гъапlну.
Магьа 17-пи ноябри мини-футболин аьхю турнир кlули гъубшну. Душваъ Табасаран райондиан 21 команда иштирак гъахьну.
Гьеле думу йигъан гьава мичlлиб вушра, вари командйир гъафну.
Гвачlнин сяаьт урчlвубди му турнир ачмиш гъапlу.
Табасаран райондин дяват отделин руководитель Аьбдулжалил Исрафиловди, турнир ачмиш апlури, мицдар серенжемарикан айи манфаьтнакан гъапну.
Турнир ачмиш апlбаъ гьацира Муфтиятдин Кьибла терефнаъ айи полпред Мугьяммад Майранов, Табасаран райондин главайин заместитель Заур Мусаев, РД-йин НС-дин жигьиларин парламентдин председатель Хочбар Баркаев, Табасаран райондин имамарин Советдин председатель ва гьацира «Ассалам» газатдин редактор Ансар Рамазанов, ДЮСШ-дин директор Садык Османов иштирак гъахьну.
«Гъи мицдар серенжемар гъахуб ужуб ляхин ву. Гьамци жигьилар чиб-чпихъди таниш шулу, ужудар аьлакьйириъ шулу ва гьаддиз арайиъ гъардаш’валра заан дережайиинди шул кlури, умуд киврухьа», - гъапну Мугьяммад Майрановди.
Табасаран райондин главайин заместитель Заур Мусаевди чан улхбаъ гъапну: «Му турнириъ 21 команда иштирак шула. Гьамдиан гъаври шулхьаки, ухьу райондин 5 йисандин арайиъ гъизигу зегьметар зяя гъахьундар, натижйир ужудар хъуркьувалар айидар гъахьну. Магьа мини-футболин площадка дивну, мушв`ин уйнамишарра гъахура. Гележегдиъ хъана заан хъуркьувалар шул кlури, умуд киврахьа».
РД-йин НС-дин жигьиларин парламентдин председатель Хочбар Баркаевди чан терефнаан райондин глава Мягьямед Сиражутдиновичдиз райондиъ жигьиларин арайиъ ужуб ляхин гъабхурайивалин чухсагъул къайд гъапlну. Дугъу гьацира райондин имам Ансар Рамазановдиз гьамциб турнир тешкил апlбан чан терефнаан баркаллагь гъапну.
Табасаран райондин имамарин Советдин председатель Ансар Рамазановди чан улхбаъ гъапну: «Гьюрматлу хялар ва турнирин иштиракчйир! Гьаму йисан ихь газатдин 20 йис тамам хьпан юбилей гъабхьну ва гьаму турнирра гьаддиз бахш дапlнайиб вуйихь. Му газатди ихь райондиз аьхю мянфяаьт тувра. Гъит ихь арайиъ ислагьвал ибшри, хъуркьувалар ишри».
Турнирин натижйир:
1-пи йишв Тlюрягъ.
2-пи йишв Гюгьрягъ.
3-пи йишв Ягъдыгъ.
Му турнирин призовой фонд 70 агъзур манат вуйи.
Турнирин тешкилатчйири волейболин, борьбайин ва гьацира жара турнирар апlуз ният айиваликан мялум гъапIну.
