Бицlидарин шадвалин йигъар

Ассаламу алейкум, аьзиз ватанагьлийир! Аьхиримжи йисари бицlидарин тятlиларин вахтна Дагъустандин тамам вари шагьрар-гъулариъ бицlидар диндихъди таниш апlру дарсар гъягъюри шулу.

Гьар йисан бицlидарин натижйириз лигруган, юкlв шад шулу. Улихь вахтари мицдар мумкинвалар адайи, думуган, бицlидариз дарди, аьхюдаризкьан мицдар рякъяр ачмишди дайи.

Магьа гьамус Табасаран ва Хив райнарин гизаф гъулариъ дарсар гъягъюра. Эгер гьарсаб гъулаз мялимар гьуркlрадарш, бицlидар багахь хьайи гъулариз гъягъюра. Гьаму ляхниан аьгъю шулаки, бицlидариз аьраб алфавит дубгъуз, гирами Каламдиан гьярфар дургъуз лап аьшкь а.

Думутlанна гъайри, мялимарира бицlидарик аьшкь капlра. Гьяфтайин арайиъ исккан гьисаб саб ражари дурари бицlидариз меълишнар ва жара иццишнар тувра.

Абйир-бабар кlуруш, чпин веледар дарсариз гъягърувалиин шад ву. Магьа дурарикан саспидарин фикрар.

Мусаиб: «Йиз веледар тятlиларин вахтна дарсариз гъягъюри магьа кьюд йис ву. Кьюд йисандин арайиъ урхузра гъудубгъну, апlру гаф-чlалра гизаф къайдайиз гъафну. Му ляхниин узу лап шад вуза».

Майсарат баб: «Гьяйиф му ляхин хъанара ухди ккедребгъуб. Фукьан бицlидариз мянфяаьт кайи ляхин даринхъа! Хулаз гъафи худлари узузра чпи мистаъ гъудубгъуб ктибтури шулу - пайгъамбарихъди ﷺ гъахьи гьядисйир, асгьябарикан ва имамарикан вуйи ихтилатар. Узу мурарихъ аьшкьниинди хъпехъури шулза».

Ав, абйир-бабар, чпин веледари ужувлакан дубгъруган, гизаф разиди шулу. Абиз-бабаз варитlан артухъ ккуниб веледдин шадвал ву, хъа шадвал Аллагьу Тааьлайин ва Пайгъамбарин ﷺ рякъ бисувалиъ а.

Гьаддиз, саб кlуруб, гьамцдар курсар ачмиш апlбан аьхю вуйи чухсагъул Дагъустандин Муфтиятдиз, кьюб кlуруб, му дарсар туврайи аьлимариз, имамариз, тялимариз. Гьамрар вари жалб духьну, гьамциб ужуб натижа тувра.

Гъит Аллагьу Тааьла варидарикан рази ишри, гьарсарин хизандиъ берекет ибшри, хъа ихь бицlидариз гележегдиъ хъуркьувалар ишри.