Гъудгник дару вахтна Кьур’ан урхбан сужда апIбан къайда
Кьур’ан урхбан сужда апIру касдиз 4 рукну а:
- Ният
- «Аллагьу акбар» кIури суждайик кучIвуб.
- Саб сужда апIуб.
- Салам тувуб.
Сужда апIуз ккуни касди аят аьхириз урхайиз ккилигну ккунду.
Му сужда улупнайи суннатар, адабар тамам апIури дапIну ккунду. Суждайин аятар урхурайири гъудгнинстар вари шартIар тамам дапIну ккунду, яни кьиблайихьинди илдицну, марцци йишв’ин дусну, ният апIуру: «Узу ният гъапIза Кьур’ан урхбан суннат сужда апIуз Аллагь бадали. Аллагьу акбар».
«Аллагьу акбар» кIуруган, гъудгник кучIвруганси хилар за гъапиIш, ужи ву. Хъасин «Аллагьу акбар» кIури суждайиз гъягъюру. Ис шлуган хилар за апIурдар. Суждайиъ айиган, ухьу гъудгнин суждайиъ урхруб урхуру, мидихъди сабси гьаму гафарра аьлава гъапIиш ужи ву: «Сажада важгьи ли-Ллязи халакьагьу ва шакка самаьгьу ва басарагьу би-гьявлигьи ва кьувватигьи, фа табарака Ллагьу агьсануль-халикьина!
Мидин кьяляхъ гьаму дюаь гъурхиш, ужи ву:
«Аллагьумма-ктуб ли бигьа индака ажран, важаьлгьа ли индака зугьран, ва даъ аьнни бигьа визран, вакьбалгьа минни кама кьабилтагьа мин аьбдика Давуда»
Мяна: «Я Аллагь! Гьамдиинди Яв улихь узуз саваб тув, ва Яв багахь му узу уьрхрубси дебкк, гьамдиинди узлан гунагь алдабгъ, Уву Яв лукI Давуддихьан фици му кьабул гъапIнуш, узхьанра гьаци кьабул апIина».
Гьацира мушваъ урхру жара дюъйирра а.
Хъасин «Аллагьу акбар» кIури суждайиан за шулу, хилар за апIурдар. Суждайиан за духьну дусру ва салам тувру.
