Гунгьарин аьфв апlри, Мирза халу!
Гунгьарин аьфв апlри, Мирза халу!
14-пи сентябри гизаф йисари Гали-Гюхряг гъулаъ имамвалин вазифйир кlули гъахурайи Мирза халу ихь арайиан гъушну.
Му кас Табасаран райондиъ айи имамарикан варитlан яшлур вуйи.
Гьарган машнаъ инчl айир, ужуб насигьятнан гаф апlрур, уткан хасиятнан кас вуйи. Фициб дюшюшдиъ вушра, ужувлан гафниинди мясляаьтнахъна хру инсан вуйи.
Мирза халу 1934-пи йисан бабкан гъахьну. 90 йис му жилиин яшамиш духьну, инсанариз мугъкан анжагъ ужувлан гафтlан гъеебхьундар. Гъул-жямяаьтдин арайиъ лап аьхю гьюрмат айир вуйи, дугъан гаф гьарган заанди вуйи.
Райондин имамарин арайиъра заан гьюрмат айи кас вуйи. Имамарик варитlан яшлур вуйивализ лигну, дугъахьна гьюрматра артухъ айи ва чавра гьюрматназ лайикьлу кас вуйи.
Мицдар ксар ихь арайиан гъягъруган кlваз гизаф гъагъиди шулу, амма думу ляхнар ухьлан асиллу вуйидар дар. Аллагьу Тааьлайин кьадар ву, ухьу думу кьадар кьабул дапlну ккунду.
Яшлу ксар гъул-жямяаьтдин арайиъ хьувал аьхю берекет ву. Дурарин апlру гаф-чlал, дурариз айи уьмрин тажруба, дурарихъан гизаф ляхнар дургъуз шулу. Гьадди мицдар ксар ихь арайиан гъушган, кlваъ пашманвалра артухъ шулу ва гъул-жямяаьт йитим гъабхьиганси шулу.
Хъа мусурман касдиз саб шадвал а: ахиратдиъ, Аллагьу Тааьлайин амриинди, ухьу вари сатlи шулхьа ва гьадушваъ чиб-чпиз рякъюрхьа.
Мирза халуйин хал-хизандиз текелиф капlрахьа. Сабур тувричвуз Аллагьди. Гъит Аллагьу Тааьлайи Мирза халуйин гунгьарин аьфв апlри, женнет кьисмат апlри, Аьхиратдин хал акуб ибшри!
Табсаран райондин имамарин советдин терефнаан, газатдин редакцияйин терефнаан багахьлуйириз текелиф капlрача ва чпиз сагъвал ккун апIурача.
Ухьу вари Аллагьдихьан вухьа ва Дугъахьна кьяляхъ хътакрудар вухьа.
