Хажалатнан хабар...
Мединайиъ
Хажалатнан
Хабар дишла
Гъарабгънийи.
Ва мухаджрар
Гьам аьсгьябар
Десте-десте
Жаргъурайи,
Ишуб, суза,
Гьарай айи,
Гьапlруш мялум
Дар саризра,
Вари мюгьтал
Духьну айи.
Вартlан дерднан,
Гъагъи йигъ ву.
Мициб гьеле
Гъябкъюб дайи.
Гьелбетда, му
Йигъкан бикlуз
Рягьятди дар.
Юкlв ибшура,
Уларилан
Гъяра нивгъар.
Шюкюр ибшри
Сар Аллагьдиз
Узуз мициб
Амур апlбан,
Думу рази
Ишри узкан.
Кьувват туври
Гъалатl дарди
Дугъри вуйи
Гафар агуз,
Фикир-хиял
Ижми дапlну,
Ихь Пайгъамбрин
(Салават ва
Салам дугъаз)
Аьхиримжи
Йигъкан бикlуз…
Хъугъри адар
Уьмар, кlура:
«Сар Аллагьди
Гьаур йикlдар,
Жил`ин гьеле
Кьюб маш гъяйи
Агъдабнарин,
Фасикьарин
Шил илмиди.
Алдабтlурза
Кlул ипурин
Му пис хабар.
Фуж ву думу?»
Ихь Пайгъамбриз
(Салават ва
Салам дугъаз)
Рягьят хьибган,
ГвачIни ухди
Хулаз гъушу
Абубакар
Кьяляхъ гъафи,
Деебхьну чаз
Чlуру хабар.
Аишайин
Хулаъ учlву,
Пайгъамбриин
(Салават ва
Салам дугъаз)
Илипнайи
Чарч за дапlну,
Мак гъапlнийи,
Хъасин гъишу:
«Абйир-бабар
Ишри гъурбан
Ву бадали
Чlивиганра.
Вуз барабар
Жил`ин хьундар,
Кечмиш хьиган
Вушра, адар».
Хъасин гъушу
Мистаз думу,
Минбарихъна
Гъахьнийи за:
«Шюкюр ибшри
Сар Аллагьдиз! –
Салаватра
Гъабхи хъасин. –
Я, инсанар,
Мугьяммаддиз
Икрам гъапlнуш,
Думу гъакlну.
Гьарган икрам
Дапlну ккунду
Сар Аллагьдиз,
Гьаз гъапиш ву
Анжах думу
Гьарган чlивир».
Абубакру
Гъурху аят
Кьур`андиан,
Хъасин гъапи:
«Мугьяммад ву
Гьаур ухьуз
Сар Аллагьди,
Мюгькам апlуз
Ихь ислам дин,
Аквар кархьуз
Инсанариз.
Инсан гъюру
Ва гъягъюру.
Ухьу ихь дин
Дюбхну ккунду.
Дидин къанун,
Фарзар вари
Тамам апlуз
Кlван ялавнак
Гьяркат кипай.
Аллагь гьарган
Рягьимлу ву,
Дугъаз вари
Рябкъюри а.
Гьарган Аллагь
Кlваъ айидар
Сар Аллагьдин
Багахь шулу
Ккуни лукlар».
Абубакру
Гъапи гафар
Гъеерхьиган,
Уьмар кlурур
Амриан гъуш
Ва алдаку.
Аллагьдикан
Ккун апlуру
Аьбдуллагь ибн
Зайди учв хьуб
Сакъур, майит
Ихь Пайгъамбрин
(Салават ва
Салам дугъаз)
Дярябкъюз чаз.
Кьабул гъапlу
Мугъан дюаь
Сар Аллагьди.
Хажалатнан
Кьадар адар,
Варибдикан
Бикlуз шулдар.
Табиаьтра
Айи яснаъ,
Ригъра, вазра
Ву жараси.
Юкlв ву хяви,
Уларилан
Гъяру нивгъар,
Лизи сакъал
Кьяши шула.
Мици уьмриъ
Зат гъабхьундар.
Гъубшу уьмур
Кlулиз гъюру
Саб герендиъ.
Гукlни гъабхьи
Му йиз беден,
Гъавриъ духьну
Уьмрин, аьжлин.
«Вартlан ккуни
Лукl Аллагьдин
Гъушу жиллан…
Шлиз фу гъубзну
Ясан гъубзди?
Жилин уьмур…
Фу ву думу?» –
Гъавриъ дарди,
Ккетlерццунзу.
***
Гъафнийи, кlур,
Жибкlуз майит
Ихь Пайгъамбрин
(Салават ва
Салам дугъаз)
Халу Аббас,
Кьюр бай дугъан
(Фадль ва Кусам),
Шид хъубзрудар –
Уьсман, Шакран.
Аьлди беден
Жибкlурайи,
Кюмекчиди
Авсра хъайи.
Аьсгьябари
Гъибиржнийи
Марцци майит
Шубуб лизи
Кафнаригъян.
Кидибтlундар
Кlулкан чалма,
Я палтарра
Алахьундар.
Наан фаркьат
Дапlну ккундуш
Ихь Пайгъамбар
(Салават ва
Салам дугъаз)
Улхуб гъабхьну
Аьсгьябарин.
Саспидариз
Ккунди айи
Накьдик кивуз
Бакьиайиъ.
–Сабур апlуб
Ккун апlурза,
Хъебехъайчва
Узухъ, – гъапну
Абубакру. –
Гъеебхьунзуз
Сар Аллагьди
Гьаурикан:
Пайгъамбар чан
Гъакlи йишвахь
Фаркьат дапlну
Ккунду кlури.
Аишайин
Хулаъ дишла
Абуталди
Гъирибкку накьв.
Ва жилари,
Йи-йицlурди
Гъюри хулаз,
Гъапlу гъудган
Жаназайин,
Хъасин – хпари…
Талат йигъра
Гъубшу гьамци
Ва гьербейин
Йишв улубкьу.
Ихь Пайгъамбар
(Салават ва
Салам дугъаз)
Фаркьат гъапlу.
Накьвдиъ учlвдар
Вуйи Аьли,
Кусам ва Фадль.
Гирами маш
Ихь Пайгъамбрин
(Салават ва
Салам дугъаз)
Аьхиримжи
Ражну гъябкъюр
Вуйи Кусам.
Курсу жархар.
Абутальхайи
Руг алабхьу.
Шид улубзур
Билал вуйи.
