Йиз кагъаз

Ассаламу аьлайкум! Узу кlваантlан Аллагьу Тааьлайихъ хъугънайи кас вуза. Бицlидихъанмина, йиз абайи-бабу улупганси гъудгнар апlури, йиз дин хъапlрайи кас вуза. Гьяждизра гъушунза, гьамус узхьан шлуганси мистариъ садакьа тувурза, гирами йишвариина зияратдиз гъушганра, садакьа туври шулза, аьжузаризра жвувхьан шлуганси кюмек апlураза.

Йиз абайихъанди, бабхъанди садакьа тувунза, пул тувну, дурарихъанди гьяжра апlуз гъитунза. Гьамци ужувлан ва савабнан жара ляхнарра апlуз чалишмиш шулаза.

Магьа гьамус яшар духьнайи кас вуза. Ихь девриъ саспидари диндикан чlуруди улхруган, кlваз лап дерд шулайиз - дурарин гафар фикриан удучlвурадариз.

Саб гьядиса ктибтидиза. Улихьнаси сар дишагьлийи кlураки, учву апlурайи гъудгниз «курцlлин» гъудган кlуру. Фукьан думу гафар Аллагьдиз аьсси вуйидар ву кlури, думу кас гъаврикк ккаърашра, амма дугъаз чан гафналан улдучlвуз ккунди адар. Му гафарикан гизаф дерд шулазуз. Дишагьлийири сужда апlруган, хилар ва хъуршлар жилиина дуркьну дивра кlури, думу касди дициб гъудгниз «курцlлин гъудган» дупна. Гьамукьадар Аллагьу Тааьлайихьан гудручlрувалиин мюгьтал вуза. Му гафарикангьадмукьан гиран дубхьназуз. Мусурмнар вуча кlурудари гьамцдар гафар апlурийинхъа?! Хъа му гафарин кьяляхъ дурарин мусурманвал гъубзрийинхъа?

Му ихь «Ассалам» йиз багъри газат вуйиз. Дидкан гизаф мянфяаьт ктабгъури шулза ва гьар йисан подпискара апlураза. Гизаф мянфяаьт а. Гьарурикан му газат урхуб ккун апlураза.

Сабсана суал. Жвуван кечмиш гъахьирихъан фукьан садакьа гъапlиш гьадмукьан ужи ву. Садакьа касибарира, девлетлуйирира бисруб ву. Фукьан садакьа тувбахъ, гьадмукьан савабра а. Амма гъи саспидари инсан кечмиш гъахьиган, дугъхъан садакьа тувуз хай шулдар кlура, фукьан чlуру гафар кlура. Гьамдин гьякьнаанра газатдин машариъ макьала бикlуб ккун апlураза.

Гъит Аллагьу Тааьлайи ухьуз ихь Ислам дин марцциди хъапlуз кюмек туври.