Пайгъамбарин ﷺ ляхин давам апlури…

Ассаламу аьлейкум, аьзиз ватанагьлийир! Пайгъамбари ﷺ ва Дугъан асгьябари, диндикан ктибтури, дин рабгъури, Шариаьтдин къанунарикан ктибтури, инсанар гъаврикк ккаъри гъахьну. Пайгъамбарин ﷺ рякъ магьа гьамциб ву. Дугъан кьяляхъ му рякъ асгьябари, табиинари, хъасина гьякьлу салигьинари ва ихь вахтарин аьлимари давам апlура.

Думу фу рякъ ву? Илимдин рякъ, гьялална гьярам жара апlру рякъ, Пайгъамбарин ﷺ суннайикан вуйи рякъ ву.

Исламдин жюрбежюр месэлйирихъди таниш апlбан, дурар гьял апlбаъ ишлетмиш апlру дюзи рякъяр-ражар агбан бадали, Кьбла Дагъустандин жюрбежюр районариъ нубатнахъди гьар султ йигъан мажлисар гъахура. Мушваъ дупну ккундуки, Табасаран райондиъра гьар жвуми йигъан хябякъган жа-жара гъулариъ райондин мажлисар кlули гъягъюра.

Магьа Табасаран райондин Жагътlил гъулаъ, Кьибла Дагъустандин жюрбежюр шагьрар-районарианра хялар дуфну, аьхю мажлис кlули гъубшну.

Мажлис ачмиш апlури, Ризван Гьябибовди мицдар серенжемар гъахбан мянайикан ва дурарикан айи хайирнакан гъапну. Думутlанна гъайри, дугъу гьацира, жвуван багъри райондиъ мицдар мажлисар шлуган, гевюл хъанара ачухъ шулу, гъапну.

Кьибла терефнаъ муфтиятдин гьуркlу ихтиярар айи вакил Мугьяммад-Рамазан Ражабовди уч духьнайидариз, тасаввуф фу вуш, истигъаса ва тавассул апlбан мяна фу вуш, уч духьнайидариз, гъаври шлуси, яркьуди ачмиш гъапlну.

«Гизафдариз чпин диндин аьгъювалар адрувалиан тlарикьат агьлуйири ширк апlуру, шейхариз ибадат апlуру, кlури шулу. Думу кучlлин гаф ву. Магьа узу тlарикьат агьли вуза. Валлагьи, биллагьи, узу шейхариз саб ибадатра апlурадарза, ва апlуз ниятра адариз. Хъа дурарихьна аьхю гьюрмат айиз ва гьамусдихъантинара дурарин гьюрмат уьбхидира вуза. Хъа гъи му рякъюъ айидарик мицдар нукьсанар кирчрайидари аьхю футна апlура», - гъапну полпредди.

Ислам диндин илмарин доктор Мугьяммад-Амир Мевлютовди чан улхбаъ инсандин кlваъ айи рюгьнан уьзрарикан ктибтну ва, дурар дархьбан бадали, дурар кlваан адагъбан бадали гьапlну ккундуш, яркьуди ктибтну.

Агъул райондин имам Къурбан Рамазановди чан улхбаъ, асас вуди, жигьилариз тувну ккуни тербияйикан ктибтну.

«Учву мектеб ккудубкlбан кьяляхъ баяр-шубар жара йишвариз урхуз гьаъруган, дурарин гъиллигъариз, тербияйиз асас фикир тувну ккунду. Хулаъ айиган дурар фици вушра абайин, бабан уларикк шула. Хъа аьхю шагьрариз гъушиган, дурариз ужубна-харжиб улупру ка сади шулдар. Гьаддиз му ляхниз асас фикир тувну ккун», - гъапну Къурбан -ьяжийи.

Ислам илмарин доктор, Ишбербаш шагьрин имамарин председатель Аьгьмад Мягьяммадовди инсан фаракьат апlруган тамам дапlну ккуни бязи аьдатарикан яркьуди ктибтну.

«Гьюрматлу жямяаьт! Ухьуз инсан фаракьат апlруган дапlну ккуни ляхнар, инсан кечмиш хьувалихъди аьлакьалу вари фарзар-суннатар ихь диндиъ ачухъди улупна. Амма бязидариз, му фарзар-суннатартlан,жюрбежюр аьдатар заанди ву. Мисалназ, саспидари инсан кечмиш духьну 52 йигъ къайд апlбаз аьхю фикир тувра. Думу ихь диндиъ айиб дар, гьаз ухьу думу апlура? Гьамци ву имбу ляхнарра», - гъапну Аьгьмад гьяжийи.

Табасаран райондин имам Ансар Рамазановди чан улхбаъ вари уч духьнайидариз чан ва жямяаьтдин терефнаан чухсагъул къайд гъапlну ва гьаму гафар аьлава гъапlну: «Гьюрматлу имамар, аьлимар, дуфнайи хялар! Аллагьу Тааьлайи ухьуз фукьан вушра ниъматар тувна. Лигайчва гъийин йигъан ихь къайдайиз. Ухьу йигъ-йишв дарпиди гьямд дапlну ккунду. Мицдар мумкинвалар ихь улихь яшамиш шули гъахьидариз гьичра гъахьундар. Ихь аьлимарин тарих ахтармиш апlури, дурариз диндин рякъ гъабхуз фукьан читинди гъабхьнуш, мялум шула. Гьаддиз ухьу Аллагьу Тааьлайиз гьямд апlру инсанарикан духьну ккунду», - къайд гъапlну райондин имамди.

Дупну ккундуки, Жагътlил гъулан жямяаьт мицдар серенжемар кlули гъахуз гьарган разиди ву. Гъулан имам Гьясаняли халу улихь гьучlвну, чан жямяаьтдин кlулиъ ади, дурари мицдар серенжемар кми-кмиди ва заан дережайиинди гъахури шулу.

Му мажлис тешкил дапlну, кlули гъабхуз кюмек гъашидариз, дуфнайи хялариз ва иштирак гъахьидариз варидариз аку гележег ва заан хъуркьувалар ккун апlурача. Гъит Аллагьу Тааьла варидарикан рази ишри!

Муслим Раджабов