Аьхю ужара бикlричвуз, жигьилар!
Аьхю ужара бикlричвуз, жигьилар!
Ассаламу аьлайкум, гьюрматлу редакция! Узу школайиъ мялимвал апlури, магьа 40 йистlан артухъ вуйиз. Гьарсаб йигъ бицlидарин, жигьиларин арайиъ удубчIвурайиз, гьадмукьан жюрбежюр дигиш’валарра рякъюразуз.
Аьхиримжи йисари школйириз Дяват отделиан жигьил баяр гъюри шулу, ва гьадрари школьникариз ктибтруб гъеебхьган, юкlв гизаф рази шулу.
Гьар ражари дурар гъафиган, бицlидарин жюрбежюр суалариз жавабар туври, гизаф ужуб сюгьбат шулу.
Магьа улихьнаси нубатнан ражари ич школайиз жигьил аьлимар гъафну ва дурари мялимарихьна, абйир-бабарихьна ва аьхюдарихьна дубхьну ккуни гьюрматнакан ктибтну.
Дупну ккундуки, му жигьилар, диндинси, светский образованияра айидар, утканди палат алабхьнайидар, чпин терефназди гъилигган хуш шлудар вуйи.
Му ксари сабпи нубатнаан мялимарихьна гьюрмат ади дубхьну ккуниваликан яркьуди ктибту. Дугъриданна, душваъ дуснайи мялимариз му ксари кlуру гафар ерхьуб гизаф хуш вуйи. Баракаллагь баяриз!
Гьамдихъди сабси пуз ккундузузки, мялимвал думукьан рягьят ляхин дар. Мялимди гьарсар ученикдихьна ужуб аьлакьа уьбхюз, дугъан психология ахтармиш апlури, думу бицlириз айи ужудар гъиллигъар ачмиш апlуз чалишмиш духьну ккунду.
Мялимди шлубкьан аьхю сабур апlури ккунду, саб классдиъ 18-20 ученик дуснайиган, мушваъ къайда хьпан бадали, мялимдин аьхю устадвал ккунду. Мидихъди сабси мялим чав бицlидари чаз гьюрмат апlруганси гъузну ккун.
Кьюбпиб, му дуфнайи хялари ктибтуб абйир-бабарихьна гьюрмат апlуб ву. Му тема, ухьуз аьгъюганси, гъи чарасуз гизаф фикир тувну ккуниб ву. Улихь вахтари абин-бабан гаф заанди вуйи, хъа гъи веледариз чпи жвуван абйир-бабартlан заанди, фикирлуди рякъюра. Ав, белки, аьгъювалар айидар шул, хъа уьмрин тажруба шлинуб аьхюб ву? Жараб дарш жвуван аби-бабу жвувахъ гъизигу зегьмет кlваълан гьапIну ккундар.
Абйир-бабариз аьссивал апlуб аьхю гунгьарикан ву, гъапну му жигьилари. Сар бицlири суал тувну: «Йипайчва, халу, абйир-бабарихъ вари дюшюшариъ, яни дурари чlуруб апlин кlурашра, хъпехъну ккундин?» Дяъват отделин гъуллугъчийиз му суал кьабул гъабхьну ва дугъу гамциб жаваб тувну: «Чухсагъул уву нач дарапlди мициб суал тувбан! Ваъ, ужур бай, эгер Аллагьу Тааьла гъадагъа дапlнайи ляхин апlин кlураш, ясана саб жара чlуру ляхин апlин кlураш, думу дапlну ккундар. Думу ляхнин гьякьнаанра абана баб гиран даршлуганси гъаври итну ккунду. Гьятта гьаму суалнаъра кмиди ухьуз абизна бабаз гиран даршлуганси жаваб тувай, кlура. Гьамдихъди хъанара аьлава апlуз ккундузузки, гъи учву вари телефнариъ деъну шулчва. Аба-бабу дих апlруган, саспи вахтари деребхьрайи гьисаб апlури, жавабкьан тувурдарчва, ясана ярхлаан «гьай» дупну гъибтрачва. Дици дубхьну ккундар, учвуз абинна бабан дих гъеебхьган, багахьна дуфну, дих апlбан себеб гьерхну ккунду. Гьаци гъабхьиш жвуван аьхюдарихьна заан гьюрмат улупуб шул».
Гьамциб уткан жаваб тувнийи му касди.
Хъасин жвувтlан аьхюдарихьна, яшлуйирихьна гьюрмат улупбакан ктибтну.
Мурари кlуру гьарсаб гаф гъийин йигъаз лап хайирлуб ву.
Мициб отдел тешкил дапlну, гьамци школйириъ урхурайи ученикарихъди ляхин гъабхбан чпиз аьхю чухсагъул.
Гъит Аллагьу Тааьлайи учвуз жандин сагъвал, кlван шадвал, хизандиъ берекет, гележегдиъра хъуркьувалар тувричвуз.
