Жиларин варитIан ужуб ччвур. Гьаз Аллагьдин ччвур тувуз хай шулдар?
Веледдиз ччвур тувувал мусурман касди апIру жавабдар ляхнарикан саб ву. Веледдиз ужуб ччвур тувувализ хусуси фикир тувну ккунду. Баяриз фуну ччвур тувну ккун ва гьаз Аллагьу Тааьлайин ччвур тувуз хай шулдар?
Жаваб:
Гьямд ибшри Аллагьу Тааьлайиз, салават ва салам Пайгъамбариина.
Инсандиз ужуб, уткан ччвур тувувал сунна ву. Веледдиз ччвур ктабгъуз адашиз мумкинвал тувубра ужуб ляхин ву. Адаш адарш, аьхю абайиз ва гь.ж.
Баяриз вуйи варитIан заанди дебккнайи ччвур Аьбдулла ву, хъа Аьбдуррагьман, хъасин «аьбд» кIури ккергърайи Аллагьу Тааьлайин ччвурар, мисалназ Аьбдурразакь, хъасин Мугьяммад, хъасин Аьгьмад.
Ихь Пайгъамбарин ччвурарикан саб Аьбдуллагь ву.
Инсандиз фунур вушра пайгъамбарин ччвур ва гьацира малаикарин ччвурарикан сабунуб тувуз хай шулу. Мугьяммад кIуру ччвурнаъ гизаф заанвалар а, ва думу ччвур тувубра ужи ву.
Ужудар дару ччвурар дигиш дапIну ккунду, мяна адрудар, чIуру мяна туврудар, кялхъру мянайиндар.
Анжагъ Аллагьу Тааьлайиз хас вуйи ччвур тувуб гьярам ву, мисалназ, ар-Рагьман, аль-Кьуддус, аль-Мугьаймин ва гь. ж. Гьацира хай шулдар улихь «аьбд» гьапIну Аллагьу Тааьлайин дарди, жара ччвурар тувуз. Мисалназ, Аьбдуррасул, Аьбду-Наби, Аьбдул-Аьли, Аьбдул Гьюсейн, Аьбдул-Кяба. Мици ччвурар тувуз хай шулдар. Гьацира ЖаруЛлагь ва РафикьуЛлагь ччвурар хай шулдар. Эгер инсандиз му ччвурар тувнаш, дигиш дапIну ккунду.
Веледариз чпин абйир-бабариз дурарин ччвурариинди дих апIуб карагьат ву, дурариз ада шва дада дупну ккунду.
Магьа ухьу фицдар ччвурар кадагъну ккундуш ва фицдар ччвурар дигиш дапIну ккундуш, ухьуз вари улупна, гьаци вуйиган му ляхнизра дикъатниинди фикир тувай.
Гъит ихь веледариин пайгъамбарин ва имбу пайгъамбрарин ччвурар ишри. Гьацира учвуз мяна аьгъдру ччвурар мутуванай, аьгъю касдихьан гьерхну аьгъю дапIну, хъа тувай.
