Жигьилариз ягъурлу рякъ ибшри
Ассаламу аьлайкум, гьюрматлу жигьилар! Магьа мектеб ккудубкlну, гьарури чан уьмрин жилгъа ктабгъру вах улубкьна. Шли урчlвубпи класс ккудубкlну, хъа шли - тамамди йицlисабпи класс. Ва гьамус сарун мектебдин кьяляхъ ярхи уьмрин яркьу рякъюъ учlвру вахт ву. Гьарури чаз чан кlваз хуш вуйи рякъ кадабгънашул. Гьамдихъди ихь жигьилариз саб насигьятнан гаф пуз ккундузуз.
Гьюрматлу жигьилар! Мектеб ккудубкlну учву наана гъушишра, ихь багъри юрдар кlваълан магьаанай, учву нааънан вуш аьгъяди гъузай. Ихь аьхю уьлкейин фуну кlакlнахъна гъушишра, мусурманвалин хусуси лишнар магатlахьанай.
Гьенглу жигьилвалиан саспи дюшюшариъ духьну даккни ляхнар арайиз гъюру, амма йиз мясляаьт кьабул апlинай: учву закурин йигъан швумал шлуб сабра мапlанай.
Учвкан фуж-вуш духтир шул, фуж-вуш мялим, гьяким ва гь.ж, фициб гъуллугънаъ, кеспнаъ гъахьишра, учву апlурайи ляхин дикъатниинди, марцциди, Аллагьу Тааьла рази шлуси апlинай. Думутlанна гъайри, ляхнихьна багахь иликlайиз, сабан жвув урхурайи йишваъ ужуб тербияйин лишнар ва заан хъуркьувалар улупай. Фуну йишваъ урхурашра, уву думу ляхнин пишекар духьну ккунду, ари гьадмуган халкьдизра увкан мянфяаьт шул.
Дагъустандиъ дарди, жара регионариз урхуз гъягърударикан ккун апlураза: Душваъ учвухьинди гъилигиган, учвкан ужуб фикир апlури гъибтай. Абйир-бабари хулаъ, мялимари мектебдиъ туву тербия саб дупну кlваълан магьапlанай. Гъит гьарсарин улихь учву ужуб хасиятнан инсанди, заан аьгъювалар гъадагъру жигьилси ишри. Жара региондиъ учву, дагъустанлуйир, сатlи гъахьиган, чиб-чпиз кюмек апlури, мялимари кlурубдихъ хъпехъури, дурари учву имбудариз нумунади улупруси дийигъай, жвув`ин алиб намуслувалиинди тамам апlуз чалишмиш йихьай. Гьадму ву ихь мусурманвалин лишанра.
Учвлантина жвуван абйир-бабарихьна аьрзйир гъюруганси мапlанай.
Мектеб ккудубкlну аьхю шагьриз адахъиган, уьмриъ фу-вушра хьуз мумкин ву, амма гьарсаб дюшюшдиъ сабурлуди, фикир дапlну лик алдабгъури гъахьиш, ужи шул.
Сабсана ляхниз фикир тувуз ккундузуз: гизафдар, иллагьки баяр, чпиз лазим дару чlуру ляхнаригъ гъючlвуз хъюгъру, папрусихьна, убхърубдихьна зигуру. Му ляхнар ухьуз, мусурмнариз, хас вуйидар дар. Ухьу дурар багахь дапlну ккунидар дар. Ухьуз ихь диндиъ, жвуван бедендиз зарар тувру вари ляхнарихьан ярхла йихьай, дупна. Учву наан ашра, фарз гъудгнар апlуз кlваълан магьарханай, Рамазандин ваз улубкьган ушв дибисну, шлубкьан мистаз таравигь гъудгнариз гъягъюз чалишмиш йихьай. Эгер учву Аллагьу Тааьлайин фарзарихьна заан къайдайиинди лигури гъахьиш, Аллагьу Тааьлайи учвузра вари ичв ляхнартиъ кюмек тувур. Аллагьу Тааьлайиз, инсанди аьссивалар апlруган, ккун шулдар, хъа Чаз гьямд апlури, ужувлан ляхнар артухъ апlуруш, ккун шулу.
Ичв уьмриан хьуд йис гъябгъиди, университет, институт ккудубкlну аьхю пишекрар духьну, жюрбежюр ляхнариъ хьидичва. Думуган читинди дархьбан бадали, гьамус жвуву урхурайи йишваъ заан аьгъювалар гъадагъну ккунду.
Гъит Аллагьу Тааьлайи уьмрин рякъ акуб ва яркьуб туври, гъит ичв гележег Аллагьу Тааьла рази шлуб ибшри. Гьич учвланмина сабанра абайин-бабан, гъул-жямяаьтдин терефназ гаф гъюру ляхнар даришри.
