РД-йин муфтий шейх Аьгьмад-афандийи тебрик апlура
РД-йин муфтий шейх Аьгьмад-афандийи тебрик апlура
Ассаламу аьлейкум ва рагьматуллагьи ва баракатугь(у), гьюрматлу гъардшар ва чйир!
Мусурмнариз варитlан заан ва гирами Гъурбан машккврахъди кlваантlан тебрик апlураза!
Гъурбан машкквар гьяждиз душнайидари думу тамам дапlну ккудубкlбахъди аьлакьалу ву. Гъит Аллагьу Тааьлайи варидарин гъапlу гьяж, ибадат кьабул апlри ва хъанара артухъ ужувлан ляхнар апlуз мумкинвал туври. Му гирами йигъар-йишвари мискинар-фагъирариз кюмек апlури, дурариз ухьу гъапlу гъурбандин йикк туври, дурар рази апIуз чалишмиш духьну ккунду.
Аллагьу Тааьлайи гирами Каламдиъ ухьухьна илтlикlури дупна (мяна): «Учву жвуваз ккунибдикан Аллагьдин рякъюъ харж дарапlдикьан гагьди, учвуз Аллагьу Тааьлайин разивал хьибдар. Учву фукьан харж гъапlнушра, Аллагьдиз дидкан аьгъя (сура «Али Имран», 92-пи аят). Гьаци вуйиган, ухьу му ляхниз дикъатниинди фикир тувну ккунду.
Аьгъзрариинди ихь ватанагьлийир Ислам диндин асас мурхьларикан сабунуб тамам апlуз гьяждиз гъягъюру. Гьямд ибшри Аллагьу Тааьлайиз, ухьуз дина душну жвуван фарз тамам апlуз мумкинвал айивализ.
Гъит Аллагьу Тааьлайи ихь гъапlу гъурбан, гьяждиъ айидари гъапlу ибадат, дюъйир кьабул апlри! Амин!
Варитlан асас машквар улубкьбаз себеб вуди, мусурмнариз мискинар-фагъирариз ва гьацира жара читинвалариъ айи касариз кюмек апlури шулу.
Гъит Аллагьу Тааьлайи гьарсарин туву садакьа кьабул апlри!
Ккун апlураза Аллагьу Тааьлайикан му жилиин ислагьвал хьуб, бедбахтваларихьан ва балйирихьан ухьу уьрхюб.
Варидарин гирами Гъурбан машквар мубарак ибшри!
