Табасаран халкьдин мажлис
Табасаран халкьдин мажлис
8-пи сентябри Мягьячгъала ва Каспийск шагьрарин арайиъ тикмиш апlурайи Иса пайгъамбарин ччвурнахъ вуйи Духовный центриъ Табасаран халкьдин аьхю серенжем кlули гъубшну.
Му мажлисназ жюрбежюр йишвариан инсанар уч духьнайи. Думу йигъан гвачlнин ухди жигьилар уч духьну хялар гъяйиз гьязурлугар апlуз хъюгъю.
Лисундин гъудгнин вахт шули, хялар гъюру вахтназ, магьа вари гьязурди айи.
Лисундин гъудгнар дапlну, вари столарихъ дусу. Магьа серенжем ккебгъуз вари гьязурди айи.
Дупну ккундуки, му йисан уч духьнайидарин арайиъ кьюб путёвка уьмрайиз ва гьацира Porsche Cayenne машин тупут ипрайи.
Му пешкешерра айиб аьгъяди, улихь йисаритlан гьаму йисан хъанара артухъ инсанар уч гъахьну.
Гирами Каламдиан аятар урхбиинди гюрчег мажлис ачмиш гъапlну.
Уч духьнайидарин улихь сарпир вуди Хив райондин имам Шябан Салихов гъулхну. Дугъу чан улхбаъ жикъиди Пайгъамбарин ﷺ уьмрикан, думу бабкан гъахьи вазликан ктибтну ва гьацира вари уч духьнайидар гирами вазлихъди кlваантlан тебрик гъапlну.
Хив райондин глава Ярмет Ярметовди нубатнан ражари гьамци Духовный центриъ табасаранлуйир уч духьну ихь халкьдин сабвал улупуб заан хъуркьуваларикан ву ва гьацира, гьеле му Центр дивну ккудубкlнадаршра, мушваъ халкьар сабвалихъна хру ляхнар заан дережайиинди кlулиз гъахура, гъапну.
Дагъустандин главайин советник Замир Гьяжимурадовди чан улхбаъ гъапну: «Гьюрматлу табасаранлуйир! Гъи ухьу вари Пайгъамбар ﷺ бабкан гъахьи вазли ихь Пайгъамбарикан ﷺ улхуз уч духьнахьа. Гъит Аллагьу Тааьла ухькан рази ишри. Гьацира ихь СВО-йиъ айи баяриканра кlваълан гьапlну ккундар. Ихь жилиин ислягьвал хьпан бадали, ухьуз ужуб уьмур хьпан бадали, дурари гизаф зегьмет зигура».
Уч духьнайидарин улихь Муфтиятдин Кьибла терефнаъ айи вакил Мугьяммад Ражабов, Дербент шагьрин Мугьяммад Ярагъийин ччвурнахъ вуйи мистан имам Мугьяммадтlагьир Аьгьмадов, Чинар гъулан имам Мугьяммад Керимов гъулхнийи.
Дурарикан гьарури Пайгъамбарин ﷺ уьмрикан, Дугъу ухьуз гъибту суннайикан ва, мицдар мажлисарикан фициб мянфяаьт аш, гьаддикан яркьуди ктибтну.
Муфтиятдин ЮТО-йиъ айи полпред Мугьяммад Ражабовди чан улхбаъ гъапну: «Гьюрматлу табасаран жямяаьт! Гъи нубатнан ражари гьаму Духовный центриъ уч духьнахьа ва нубатнан ражари варидари сатlиди Пайгъамбарихьна ﷺ вуйи мюгьюббатвал улупурахьа. Гъит Аллагьу Тааьла гьарсар касдикан рази ишри ва гъит ихь уьлкейиъ гьарган ислагьвал ибшри!»
Мажлиснан аьхириъ Табасаран райондин имам Ансар Рамазанов удучIвну гъулхну.
«Гьюрматлу табасаран халкь! Йислан-йисаз гьамци уч шули ухьу ихь халкьдин сабвал ва Пайгъамбарихьна айи ккунивал улупурахьа. Ихь аьхю абйири ухьухьна фици утканди Ислам дин гъурубкьнуш, ари гьаци ухьу заан къайдайиинди думу гъюру насларихьнара дурубкьну ккунду. Гьаддиз ухькан гьарури Ислам дин бадали сабкьадар зегьмет дизигну ккун», - гъапну Ансар Рамазановди.
Мажлиснаъ улхбарин арайиъ «Нашидуль Ислам» группайин солист Мугьяммад-Шафи Аьшуровди чан уткан сеснииинди назмар-мавлидар гъурхну.
Магьа вари ккилугурайи йишвахъна гъафи - уьмрайиз вуйи путёвкйир ва машин. Сабпи нубатнаан кьюб Уьмра туву ва дурар Огни шагьриан вуйи шубариз кьисмат гъабхьну. Хъа машин кlуруш, Дербент райондин Чинар гъулан агьалйириз.
Гъит Аллагьу Тааьлайи му серенжемдиз туву садакьйир, гъизигу зегьметар заан дережайиинди кьабул апlри. Варидариз хъуркьувалар ва бахтар ишри!
Ансар Рамазанов
