«Аль-Фатигья» урхбалан кьяляхъ сура урхбан гьякьнаан
«Аль-Фатигья» урхбалан кьяляхъ сура урхбан гьякьнаан
ГвачIниндин кьюби ракааьтариъ ва имбу гъудгнарин сабпи-кьюбпи ракааьтариъ «Аль-Фатигья» урхбалан кьяляхъ Кьур’андиан сура урхуб суннат ву. Шубубпи, юкьубпи ракааьтариъ урхуб суннат дар.
ВаритIан цIиб шубуб аяткьан урхуру. БицIи сура тамамди урхбаъ саваб артухъ а, аьхю сурайиан гьацI урхбаътIан. Пайгъамбарихьан ﷺ дуфну, жюрбежюр гъудгнариъ дугъу улупнайи сурйир урхуб суннат ву.
Гъудгнин гьарсаб ис ва за шлу йишвахь «Аллагьу акбар» кIуру. Саб рукнуйиан тмунубдихьна рукьайизкьан «Аллагьу акбар» кIури зигури гъибтуб ужи ву. Хъа рукуъдиан за шлуган, «Самиаь Ллагьу лиман гьямидагь» кIуру.
Имамдиз гъудгник кучIвруган, ис ва за шлуган «Аллагьу акбар» ягъалди пуб суннат ву.
Гъудган апIурайири «аль-Фатигьяйин» кьяляхъ фицдар аятар гъурхишра, ясана саб аят кьюбиб ракааьтариъ гъурхишра, суннат апIувал гьисаб шула.
Рякъюъ адру касди, ясана ярхи гъудган апIуз рази вуйи жямяаьтдин имамди гвачIниндин гъудгниъ «аль-Фатигьяйин» кьяляхъ «Гьюжурат» ва «Аьмма» сурйирин арайиъ айи ярхи сурйир урхуб суннат ву. Лисундин гъудгниъ гьаму сурйирикан жикъидарстар урхуру. Хъа гвачIиндин ва йишвандин гъудгнариъ «Аьмма» сурайихъан «Ваддугья» сурайихъна вуйидарикан, хъа лавландин гъудгниъ «Ваддугья» сурайихъан Кьур’ан ккудубкIайизкьан вуйидарикан гъурхиш ужи ву.
Жвумийин гъудгнин сабпи ракааьтдиъ ва жвуми йигъандин хъитIирхбандин гъудгнин сабпи ракааьтдиъ «аль-Фатигьяйин» кьяляхъ «аль-Жумаь» сура, хъа кьюбпибдиъ «аль-Мунафикьин» сура урхуб ужи ву. Ясана сабпибдиъ - сура «Аъла», кьюбпибдиъ - «Гъашиягь».
Жвуми йигъандин гвачIниндин гъудгнин сабпи ракааьтдиъ «Алиф ла мим танзил», хъа кьюбпибдиъ «Гъашиягь» урхуб ужи ву, ва гьаму къайда уьбхюбра ужи ву.
Жвуми йигъандин лавландин гъудгниъ ва рякъюъ айири гвачIниндин гъудгниъ гьарган сабпи ракааьтдиъ «аль-Кафирун», хъа кьюбпибдиъ «Кьул гьуваллагьу» урхуб суннат ву.
