Кьюб гъулан имам
Ахьитl ва Жвулли гъулан имамдихъди интервью
Ассаламу аьлайкум, аьзиз ватанагьлийир! Магьа нубатнаан ражари ихь имамарикан вуйи мялумат туврахьа. Гъийин ихь интервью туврайи имамдин чан хусусивалар а. Дурарикан саб - думу кьюб гъулан имам вуйивал.
Ав, му касди Аллагьу Тааьла бадали кьюб жямяаьтдин ляхнариз лигура, мистан имамвал апlура ва чаан удукьруси жямяаьтарин гъайгъура зигура.
Гъачай ихь газат урхурайидар Ахьитl ва Жвулли гъуларин имам Аьгьмадпаша Аьлимягьямадович Гьяжиевдихъди таниш хьидихьа. Йиз фикриан, ихь газат урхурайидариз, фици сар касди кьюб гъулан имамвал апlураш, дицир кас фици яшамиш шулаш, аьгъю апlуз лапра ккун шул.
- Аьгьмадпаша халу, уву наан бабкан гъахьунву ва, дишлади гьерхрухьа, кьюб гъулан имам фици гъахьунва?
- Узу 1980-пи йисан Табасаран райондин Ахьитl гъулаъ бабкан гъахьунзу. Саб яш гъабхьиган, диндин ляхнар гъахуз узхьан шлуси кюмек апlуз хъюгъюнза. Ва жямяаьтдин теклифниинди сифте ич Ахьитl гъулан имамвалин вазифйир алахьунзуин. Магьа швнуд йисандин арайиъ му жямяаьтдин арайиъ имамвалин ляхин гъабхураза. Улихьнаси райондин имам Ансар-гьяжийин теклифниинди Жвулли гъулаъра имамди дерккунзу.
- Уву кьюб гъулан имамди дерккбан метлеб фу вуйи?
- Саб вахтна Жвулли гъулаъ имамвал апlру, жямяаьтдизра лайикь шлу кас агури гъахьну. Хъа йиз дада Жвулли гъул’ан вуйиз, душваъ йиз багахьлуйирра айивализ лигну, жямяаьтдин улихь узу имамди ктагъбан месэла дивну. Магьа гьамци, жвуми йигъан жямаьтра уч духьну, думу гъулаъра имамвалин вазифйир гъахуб табшурмиш гъапIунзуз.
- Аллагьу Тааьла му жавабдар ляхнариъ кюмек ишривуз. Хъа жвуми йигъан фунуб гъулаъ шулва?
- Жвуми йигъан нубатнахъди, саб жвуми Ахьитl, хъа тмунуб Жвулли гъулариъ шулаза. Узу саб гъулаз гъушган, тмуну гъулаъ душваъ айи йиз кюмекчи шулу. Гьамци сатlиди му ляхин кlулиз гъабхурача.
- Гьаму кьюб гъулаъ имамвал апlури, дурарикан фунуб заанди рябкъюрвуз?
- Гьямд ибшри Аллагьу Тааьлайиз, кьюбиб гъуларин жямяаьтарра диндихьна, инсанарихьна гьюрмат айидар ву. Гьарсаб гъулан чан хусусиваларра а, дурар адарди гьичра даршул. Хъа гъийин йигъаз му гъуларикан узхьан анжагъ ужувлан гафтlан пуз шулдарзухьан. Жвулли гъулаъ улихь вахтари аьхю аьлимар ади гъахьну. Душваъ айи мистан минарет кlуруш, ухьуз аьгъюганси, XlX аьсри дивнайиб ву. Гьаддиз му мистахьна, му гъулахьна асас фикирра шула.
- Му гъулариъ инсанарин аьгьвалат фициб ву?
- Мушваъ саб хусусият а: фукьан сивариккна за хьубахъ, гьадмукьан ихь халкьдиз хас вуйи ляхнар ва гъиллигъар имиди рябкъюра. Гьар ражари узу Жвуллиз гъягъруган, кюгьне вахтарикан ихь абйири ктитури шлу ихтилатар кlваин шулийиз. Хъа Ахьитl гъулаъ думу ляхнар имдар пуз шулу. Жигьиларикан кlуруш, ихь тмуну гъулариъси, асас пай жара йишвариз гъазанжариз гъягъюри шулу. Гьарури чпин хал-хизан уьбхюз гьялал ризкь абгура.
- Аьгьмадпаша, уву, му кьюб гъулан имамси, Табасаран райондин миржиб гъулан «Ассалам» газатдин представителра вува. Гьадму ляхниканра мялумат тув сарун.
- Гьямд ибшри Аллагьу Тааьлайиз, думу ляхниъра иштирак хьуз мумкинвал тувбан. Ав, ихь райондин азербайжан гъулариъ подписка апlури, хъасин гьарурин хулиз думу газат рубкьури лихури, швнуд-сад йис вуйиз. Му жямяаьтдиз вафалу ва йиз кlвазра хуш ляхин вуйиз. Белки, гьадрари саб гьярф аьгъю дапlну, дурариз гъабхьи савабнакан узузра рубкьур, иншаАллагь. Гьаму жилиин ухьуз гъубзрайиб фу ву? Ухьу гъапlу ужувлан ляхнар. Гьаддиз газатдин вакилди лихуваликан гизаф мянфяаьт рябкъюразуз. Гъит му газат гьарурин хулаъ ибшри.
- Магьа ухьуз гирами Рамазандин ваз улубкьна. Гьаму вазлихъди аьлакьалу вуди, ихь газат урхурайидариз фу пуз ккундувуз?
- Гьямд апlинай Аллагьдиз, гьюрматлу ватанагьлийир. Ккудубшу йисандин Рамазандиан гьаму йисандин Рамазан улубкьайиз ихь арайиан фукьан инсанар гъушну. Аллагьу Тааьлайи магьа ухьуз сабсана Рамазандин ваз тувна. Гьарсаб ухьуз алабхъурайи гирами Рамазандин ваз Аллагьу Тааьлайихьан ухьуз вуйи пешкеш ву. Му вазли ушвар дисури, тавбу апlури, садакьа туври, таравигь-гъудгнар апlури, Аллагьу Тааьлайихьна багахь хьуз шулу. Мициб мумкинвал ухьуз ихь уьмриъ сарун алабхъуруш-алабхъурдаш, саризра аьгъдархьуз. Гьаддиз му ваз шлубкьан артухъ мянфяаьт ктабгъури ишлетмиш апlинай.
Чухсагъул увузра, Аьгьмадпаша Аьлимягьямадович, халкь бадали зигурайи яв зегьметназ. Увусдар ксар ихь диндин улихь хьайивал ухьуз аьхю хъуркьувал ва берекет ву. Гъит Аллагьу Тааьлайи увуз жандин сагъвал, кlван шадвал туври, гележег акуб ибшри.
