Абйирин ругар кlваълан гьауз шулдар…
Ассаламу аьлейкум, аьзиз ватанагьлийир! Фукьан кlурушра, наана гъушишра, багъри ругар, абйири лик диву йишвар гьархуз шулдар. Думу ляхин гьаци вуйиб магьа Гъуярик жямяаьтдин нумунайиинди аьгъю шула.
ЦIиб улихьнаси узухьна гьамусяаьт Огни шагьриъ яшамиш шулайи Гъуярик гъулан агьалйир чпин сар касра имдру гъулаз гъягъюрча кlури гъафну. Дина гъягъбан метлебра гьадушваъ улихь вахтари айи мист цlийи алапlуб вуйи.
Гъуярик гъулан гьякьнаан кlуруш, 1929-1931-пи йисари Табасаран райондин центр вуди гъабхьну.
1966-пи йисан ихь юрдариъ жилар гъутIурччвган, Гъуярик гъулан жямяаьт Огни шагьриз, Дербентдиз ва гьацира жара йишвариз удучIвну гъушну.
1975-пи йисан му гъул тамамди ккадабхъну.
Магьа 50 йисандин муддатнаъ мистан саб-кьюб метр цалар ими, мутIан гъайри сарун я хулар, я фукlа жараб му гъулаъ имдар. Филан-вуш душваъ инсанар ади гъахьиб улупукрайидар анжагъ улариз рякъюри имбу накьвартlан дар.
Магьа гьамус жигьиларин чпин абйирин ругариин хулар дивуз ва вахт-вахтарик душваз гъюб-гъягъюб ккебгъуз ният а, хъа саспи хизанар гьятта гъулаз удучlвну гъюзра кмиди гьязурди а.
Му месэлайихъ хъюгъяйиз, дурари сабпи нубатнаан мист цlийиб дивдихьа, имбу ляхнариз хъасин лигархьа, кlури ният гъапlну. Гьаму ниятназ гъилигиган, мурар иман айидар вуйиб аьгъю шулу. Гъит Аллагьу Тааьлайин амриинди чпин айи ниятар заан къайдайиинди кIулиз удучIври.
Магьа му жямяаьтдин улихь-кlулихь хьайидарихъди, мист наан дивруш, думу фициб къаматнануб шулуш ва фициб къайдайиинди дивруш, ахтармиш гъапlунча. Думу мистра Калухъ Мирзайин ччвурнахъ тикмиш апlуз ният дапlнахьа.
Му гъулаз гъушган, саб кьадар фикрарикк ккахъунзу. Саб 50-60 йис мидиз улихьна мушваъ яшлуйир, бицlидар, мал-къара – яни жанлу яшайиш ади гъабхьну. Хъа гьамус лигурваки, аьхю чюллер саб чlивишинра адарди гатIахьна. Му ксари мушваъ хулар тикмиш апlуз ккундучуз гъапиган, узу лап шад гъухьунзу.
Гъит ихь гюрчег жилариин артухъдиси ужудар инсанар мясляаьтниинди яшамиш йихьри. Ккун апlураза Аллагьу Тааьлайикан мурарин мурад-метлеб тамам апlуб. Ухьу гьякь рякъ’ин муддам апlри, гележегра акуб апlри.
